പത്തനംതിട്ടയിൽ ഓടിക്കൊണ്ടിരുന്ന ടിപ്പർ ലോറിക്ക് തീപിടിച്ചു.. ഡ്രൈവർ അടക്കം മൂന്നുപേർ…
പത്തനംതിട്ട: കോന്നി കൂടൽ പോത്തുപ്പാറയിൽ ഓടിക്കൊണ്ടിരുന്ന ടിപ്പർ ലോറിക്ക് തീപിടിച്ച് പൂർണമായും കത്തിനശിച്ചു. പോത്തുപ്പാറയിലെ പാറ ക്രഷർ യൂണിറ്റിൽ നിന്നും ലോഡുമായി തിരികെ പോകുമ്പോൾ ഉച്ചയ്ക്ക് 12 മണിയോടെയായിരുന്നു അപകടം. വണ്ടിയിലുണ്ടായിരുന്ന ഡ്രൈവർ ഉൾപ്പെടെ മൂന്നുപേരും അത്ഭുതകരമായി വലിയൊരു ദുരന്തത്തിൽ നിന്ന് രക്ഷപ്പെട്ടു.
എതിരെ വാഹനത്തിൽ വന്നവരാണ് ലോറിയിൽ നിന്നും പുക ഉയരുന്നത് കണ്ട് ഡ്രൈവറുടെ ശ്രദ്ധയിൽപ്പെടുത്തിയത്. ഉടൻതന്നെ മൂന്നുപേരും വാഹനത്തിൽ നിന്നും ചാടിയിറങ്ങിയതിനാൽ വൻ ജീവഹാനിയാണ് ഒഴിവായത്. വിവരമറിഞ്ഞ് ഉടൻ തന്നെ കോന്നി ഫയർഫോഴ്സ് സ്ഥലത്തെത്തി തീ നിയന്ത്രണവിധേയമാക്കിയെങ്കിലും, അപ്പോഴേക്കും വാഹനം പൂർണമായും കത്തിക്കരിഞ്ഞിരുന്നു. ഷോർട്ട് സർക്യൂട്ടാണ് തീപിടിത്തത്തിന് കാരണമെന്നാണ് പ്രാഥമിക നിഗമനം. സംഭവത്തിൽ കൂടൽ പോലീസും മോട്ടോർ വാഹന വകുപ്പും സ്ഥലത്തെത്തി വിശദമായ പരിശോധനകളും അന്വേഷണവും ആരംഭിച്ചിട്ടുണ്ട്.
