മാവേലിക്കര നഗരസഭയിലെ കോടികളുടെ അഴിമതി പുറത്തുവിട്ട് ബി.ജെ.പി
മാവേലിക്കര : 2020 മുതൽ 2025 വരെയുള്ള കാലയളവിൽ മാവേലിക്കര നഗരസഭ പാഴാക്കിയതും വക മാറ്റി ചിലവാക്കിയതും അഴിമതി നടത്തിയതുമായ കോടിക്കണക്കിന് രൂപയുടെ കണക്കുകൾ ബി.ജെ.പി പുറത്തുവിട്ടു. ഇന്ന് മാവേലിക്കര ബുദ്ധ ജംഗ്ഷനിൽ നടത്തിയ ജനകീയ കോടതിയിലാണ് നഗരസഭയിലെ അഴിമതിയുടെ വിവരങ്ങൾ ബി.ജെ.പി ആലപ്പുഴ സൗത്ത് ജില്ലാ അധ്യക്ഷൻ സന്ദീപ് വഛസ്പതി പുറത്തുവിട്ടത്. കേരള സംസ്ഥാന ഓഡിറ്റ് വകുപ്പിന്റെ ഓഡിറ്റ് റിപ്പോർട്ടുകളുടെ അടിസ്ഥാനത്തിലാണ് അഴിമതി വിവരങ്ങൾ ജനകീയ കോടതിയിലൂടെ ജനങ്ങളെ അറിയിച്ചത്.
2020- 2021 കാലയളവിൽ അംഗീകാരം ലഭിച്ച 248 പദ്ധതികളിൽ 123 എണ്ണം മാത്രമാണ് നഗരസഭ നടപ്പാക്കിയിട്ടുള്ളത്. ഈ കാലയളവിൽ മാത്രം അഞ്ച് കോടി 70 ലക്ഷം രൂപ പാഴാക്കി. ആധുനിക അറവുശാലയ്ക്ക് പഞ്ചാബ് നാഷണൽ ബാങ്കിൽ നിന്നും 74 ലക്ഷം വായ്പയെടുത്തെങ്കിലും പദ്ധതി ഇതുവരെ നടപ്പായില്ല. മാലിന്യനിർമാർജനത്തിനും ശുചീകരണ പ്രവർത്തനങ്ങൾക്കും ഫണ്ട് നീക്കിവെച്ചെങ്കിലും അതെല്ലാം അവതാളത്തിലായി. വിശപ്പ് രഹിത കേരളം പദ്ധതിയുടെ പേരിൽ ജനകീയ ഹോട്ടലിന് പണം അനുവദിച്ചെങ്കിലും നടപ്പാക്കിയില്ല. കാള ചന്തയിൽ പ്രവർത്തിച്ച്‌ വന്ന ഗ്യാസ് സ്മശാനം എട്ടുവർഷമായി പ്രവർത്തനരഹിതമാണ്. മാലിന്യ സംസ്കരണത്തിന് കേന്ദ്രസർക്കാർ നൽകിയ 41 ലക്ഷത്തിൽ 5.40 ലക്ഷം രൂപ മാത്രമാണ് ചെലവഴിച്ചത്. മാലിന്യം നീക്കം ചെയ്യാൻ വാങ്ങിയ വാഹനത്തിൽ പോലും അഴിമതി നടത്തി എന്നും റിപ്പോർട്ടിന്റെ അടിസ്ഥാനത്തിൽ ബി.ജെ.പി ആരോപിക്കുന്നു.
അഗതികളുടെ അടിസ്ഥാന സൗകര്യങ്ങൾക്കായി 35 ലക്ഷത്തോളം രൂപ അക്കൗണ്ടിൽ ഉണ്ടായിട്ടും ഒരു രൂപ പോലും ചെലവഴിച്ചില്ല. ഇന്റർനെറ്റ് കേബിൾ വലിച്ച വകയിൽ 20 ലക്ഷത്തോളം രൂപ അംബാനി ഗ്രൂപ്പ് നഗരസഭയ്ക്ക് നൽകാൻ ഉണ്ടെന്നും ജനം ദുരിതക്കയത്തിൽ കഴിയുമ്പോൾ അംബാനിക്ക് വഴിവിട്ട സഹായം നൽകുകയാണെന്നും സന്ദീപ് വാചസ്പതി ജനകീയ കോടതിയിൽ പറഞ്ഞു.
