മൊബൈല്‍ നമ്പര്‍ മാറിയോ? എങ്കില്‍ ആധാര്‍ രേഖകള്‍ ഉടന്‍ അപ്‌ഡേറ്റ് ചെയ്യുക… ഇല്ലെങ്കില്‍ പണികിട്ടും
മൊബൈല്‍ നമ്പര്‍ മാറ്റിയിട്ടും ആധാര്‍ രേഖകളില്‍ അത് അപ്‌ഡേറ്റ് ചെയ്യാത്ത ആളാണോ നിങ്ങള്‍? എങ്കില്‍ ഈ വാര്‍ത്ത നിങ്ങള്‍ക്കുള്ളതാണ്. ആധാര്‍ അടിസ്ഥാനമാക്കിയുള്ള ഒ.ടി.പി. (OTP) പരിശോധന ആവശ്യമുള്ള വിവിധ സേവനങ്ങള്‍ ഉപയോഗിക്കുന്നതില്‍ നിങ്ങള്‍ക്ക് വലിയ തടസങ്ങള്‍ നേരിട്ടേക്കാം. നമ്പര്‍ അപ്‌ഡേറ്റ് ചെയ്യാത്തത് ആദായനികുതി റിട്ടേണ്‍ (ITR) ഇ-വെരിഫിക്കേഷന്‍, ഡിജിറ്റല്‍ ബാങ്കിംഗ് സേവനങ്ങള്‍, ഓണ്‍ലൈന്‍ പേയ്‌മെന്റ് സേവനങ്ങള്‍, മറ്റ് വിവിധ ഓണ്‍ലൈന്‍ ആധാര്‍ സേവനങ്ങള്‍ എന്നീ പ്രധാന സേവനങ്ങളെയാണ് നേരിട്ട് ബാധിക്കുക.
പഴയ നമ്പര്‍ ഉപയോഗിക്കാന്‍ കഴിയാത്തവര്‍ക്കും ഇതുവരെ മൊബൈല്‍ നമ്പര്‍ രജിസ്റ്റര്‍ ചെയ്യാത്തവര്‍ക്കും ഈ പ്രശ്‌നം എളുപ്പത്തില്‍ പരിഹരിക്കാവുന്നതാണ്. ഔദ്യോഗിക ആധാര്‍ ആപ്പ് ഉപയോഗിച്ച് പുതിയ മൊബൈല്‍ നമ്പര്‍ അപ്‌ഡേറ്റ് ചെയ്യാവുന്നതാണ്. നിങ്ങളുടെ അടുത്തുള്ള ആധാര്‍ സേവാ കേന്ദ്രം അല്ലെങ്കില്‍ അംഗീകൃത എന്റോള്‍മെന്റ് സെന്റര്‍ നേരിട്ട് സന്ദര്‍ശിച്ചും മൊബൈല്‍ നമ്പര്‍ പുതിയ ലക്കത്തിലേക്ക് മാറ്റാവുന്നതാണ്. നിങ്ങളുടെ മൊബൈല്‍ നമ്പര്‍ ആധാറുമായി രജിസ്റ്റര്‍ ചെയ്തിട്ടില്ലെങ്കിലോ അല്ലെങ്കില്‍ പുതിയ നമ്പറിലേക്ക് മാറിയിട്ടുണ്ടെങ്കിലോ സേവനങ്ങള്‍ തടസ്സമില്ലാതെ ലഭിക്കുന്നതിനായി എത്രയും പെട്ടെന്ന് വിവരങ്ങള്‍ അപ്‌ഡേറ്റ് ചെയ്യുക.
ആധാര്‍ ആപ്പ് വഴി ചെയ്യേണ്ട വിധം….
ഘട്ടം 1: ആധാര്‍ ആപ്പ് തുറക്കുക.
ഘട്ടം 2: ‘Update Mobile Number’ എന്ന ഓപ്ഷന്‍ ക്ലിക്ക് ചെയ്യുക.
ഘട്ടം 3: ആപ്പില്‍ നിങ്ങളുടെ നിലവിലെ മൊബൈല്‍ നമ്പര്‍ കാണിക്കും. അവിടെയുള്ള ടെക്സ്റ്റ് ബോക്‌സില്‍ നിങ്ങളുടെ പുതിയ മൊബൈല്‍ നമ്പര്‍ നല്‍കുക.
ഘട്ടം 4: പുതിയ മൊബൈല്‍ നമ്പറിലേക്ക് ഒടിപി അയക്കുന്നതായിരിക്കും.
ഘട്ടം 5: ലഭിച്ച ഒടിപി നല്‍കുക, അതോടെ നിങ്ങളുടെ പുതിയ നമ്പര്‍ അപ്‌ഡേറ്റ് ചെയ്യപ്പെടും.
നേരിട്ട് അടുത്തുള്ള ആധാര്‍ സേവാ കേന്ദ്രം സന്ദര്‍ശിച്ചും ഈ സേവനം പ്രയോജനപ്പെടുത്താം. നിങ്ങളുടെ ആധാര്‍ വിവരങ്ങള്‍ നല്‍കി ആവശ്യമായ ഒതന്റിഫിക്കേഷന്‍ പ്രക്രിയ പൂര്‍ത്തിയാക്കുക. അപേക്ഷ സമര്‍പ്പിച്ച ശേഷം, സ്റ്റാറ്റസ് ട്രാക്ക് ചെയ്യുന്നതിനായി ആക്നോളജ്‌മെന്റോ അല്ലെങ്കില്‍ യുആര്‍എന്‍ നമ്പറോ കൈവശം സൂക്ഷിക്കുക. അപേക്ഷ പ്രോസസ്സ് ചെയ്ത് പരിശോധനകള്‍ പൂര്‍ത്തിയായാല്‍ പുതിയ മൊബൈല്‍ നമ്പര്‍ ആധാറുമായി ലിങ്ക് ചെയ്യപ്പെടുന്നതാണ് (പ്രോസസ്സിംഗ് സമയത്തില്‍ വ്യത്യാസങ്ങള്‍ ഉണ്ടാകാം).
