എഗ്ഗ് ഫ്രൈഡ് റൈസ് പോലും നിർത്തി… സ്കൂൾ ഉച്ചഭക്ഷണ മെനു വെട്ടിച്ചുരുക്കിയെന്ന് ശിവൻകുട്ടി

തിരുവനന്തപുരം: സംസ്ഥാനത്തെ സ്കൂളുകളിലെ ഉച്ചഭക്ഷണ വിതരണ പദ്ധതി പ്രതിസന്ധിയിലാണെന്ന് മുൻ വിദ്യാഭ്യാസ മന്ത്രി വി. ശിവൻകുട്ടി. 23.5 ലക്ഷം വിദ്യാർഥികൾക്ക് ഉച്ചഭക്ഷണം വിതരണം ചെയ്യുന്ന പദ്ധതിയാണിതെന്നും ഇപ്പോഴത്തെ സാഹചര്യം മനുഷ്യത്വരഹിതമാണെന്നും ശിവൻകുട്ടി ആരോപിച്ചു. ഓഗസ്റ്റ്, സെപ്റ്റംബർ മാസങ്ങളിലെ ഉച്ചഭക്ഷണ വിതരണത്തിനുള്ള തുക കുടിശികയാണെന്നും തദ്ദേശ സ്ഥാപനങ്ങളിൽ നിന്ന് ഫണ്ട് ലഭിക്കുന്നതിൽ കാലതാമസം നേരിടുന്നതാണ് പ്രതിസന്ധിക്ക് കാരണമെന്നും അദ്ദേഹം പറഞ്ഞു. അങ്കണവാടികളിലെ പോഷകാഹാര വിതരണവും പ്രതിസന്ധിയിലാണെന്ന് ശിവൻകുട്ടി ആരോപിച്ചു.

അരി, പച്ചക്കറി ഉൾപ്പെടെയുള്ള സാധനങ്ങൾ പുറത്തുനിന്ന് പണം നൽകി വാങ്ങേണ്ട സാഹചര്യമാണ് പല സ്കൂളുകളിലുമുള്ളതെന്നും അധ്യാപകർ സ്വന്തം കയ്യിൽ നിന്ന് പണം ചെലവഴിക്കുന്നുണ്ടെന്നും അദ്ദേഹം പറഞ്ഞു. ചിലർ സ്വർണം പണയംവെച്ചുപോലും സാധനങ്ങൾ വാങ്ങുന്ന സ്ഥിതിയാണെന്നും ശിവൻകുട്ടി ആരോപിച്ചു. നിലവിൽ ചോറും രണ്ട് കറികളും മാത്രമാണ് നൽകുന്നതെന്നും എഗ്ഗ് ഫ്രൈഡ് റൈസ് ഉൾപ്പെടെയുള്ള വിഭവങ്ങൾ ഒഴിവാക്കിയെന്നും അദ്ദേഹം പറഞ്ഞു. എൽഡിഎഫ് സർക്കാർ കൊണ്ടുവന്ന മാതൃകാ മെനു നടപ്പാക്കണമെന്നും ശിവൻകുട്ടി ആവശ്യപ്പെട്ടു. സമാനമായ മെനു വെട്ടിച്ചുരുക്കലിനെതിരെ ശിവൻകുട്ടി നേരത്തെയും വിമർശനം ഉന്നയിച്ചിരുന്നു. സ്കൂൾ ഒളിമ്പിക്സിന്റെ നടത്തിപ്പിനെതിരെയും ശിവൻകുട്ടി വിമർശനം ഉന്നയിച്ചു.

ഇന്ത്യയിൽ തന്നെ ശ്രദ്ധിക്കപ്പെടുന്ന മേളയാണ് സ്കൂൾ ഒളിമ്പിക്സെന്നും കഴിഞ്ഞ സർക്കാർ 25,000 കുട്ടികൾക്ക് താമസവും ഭക്ഷണവും ഉൾപ്പെടെയുള്ള സൗകര്യങ്ങൾ ഒരുക്കിയിരുന്നെന്നും അദ്ദേഹം പറഞ്ഞു. ഇത്തവണ സ്വർണക്കപ്പും പതാകയും പോലും കാണാനില്ലെന്നും അദ്ദേഹം ആരോപിച്ചു. സ്കൂൾ ഒളിമ്പിക്സ് സംബന്ധിച്ച് സമാന വിമർശനങ്ങൾ ഒക്ടോബർ ആദ്യവാരത്തിലും ശിവൻകുട്ടി ഉന്നയിച്ചിരുന്നു. ഓരോ മേളയും കഴിയുമ്പോൾ അടുത്ത മേള എവിടെ നടത്തണമെന്ന് തീരുമാനിക്കുന്ന പതിവുണ്ടായിരുന്നെന്നും ഇത്തവണ അതുണ്ടായില്ലെന്നും ശിവൻകുട്ടി പറഞ്ഞു. ക്ഷേമ-ആശ്വാസ പദ്ധതികളോട് പുറംതിരിഞ്ഞുനിൽക്കുന്ന സമീപനമാണ് സർക്കാരിന്റേതെന്നും അദ്ദേഹം വിമർശിച്ചു.