സി.ജെ.പി പാർലമെന്റ് മാർച്ച്… മലയാളി മാധ്യമപ്രവർത്തകന്….
കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാന്റെ രാജി ആവശ്യപ്പെട്ട് കോക്രോച്ച് ജനതാ പാർട്ടി സംഘടിപ്പിച്ച പാർലമെന്റ് മാർച്ചിന് മുൻപ് ഡൽഹിയിൽ വൻ സംഘർഷം. ജന്തർ മന്തറിൽ തടിച്ചുകൂടിയ നൂറുക്കണക്കിന് പ്രവർത്തകർക്ക് നേരെ ഡൽഹി പോലീസ് ലാത്തിവീശി. സ്ഥലത്ത് വൻ പോലീസ് സന്നാഹത്തെയും അർദ്ധസൈനിക വിഭാഗത്തെയും വിന്യസിച്ചിട്ടുണ്ട്. പ്രതിഷേധക്കാർ പോലീസിന്റെ ബാരിക്കേഡുകൾ മറികടക്കാൻ ശ്രമിച്ചതോടെയാണ് സംഘർഷം ഉടലെടുത്തത്. സ്ഥലത്ത് നിരോധനാജ്ഞ പ്രഖ്യാപിച്ചിരുന്നതിനാൽ മാർച്ച് തടയണമെന്ന് പോലീസിന് കർശന നിർദേശമുണ്ടായിരുന്നു.
പ്രതിപക്ഷ എം.പിമാർ ഉൾപ്പെടെ നിരവധി പ്രമുഖർ പ്രതിഷേധ മാർച്ചിൽ പങ്കെടുത്തു. തൃണമൂൽ കോൺഗ്രസ് എം.പി മഹുവ മൊയ്ത്രയുടെ നേതൃത്വത്തിലാണ് പ്രതിഷേധക്കാർ ബാരിക്കേഡുകൾക്ക് നേരെ പാഞ്ഞടുത്തത്. അർദ്ധസൈനിക വിഭാഗം തടയാൻ ശ്രമിച്ചെങ്കിലും അത് മറികടന്ന് പ്രതിഷേധക്കാർ മുന്നോട്ട് നീങ്ങി. സംഘർഷത്തിനിടെ പ്രതിഷേധക്കാർ പോലീസിന് നേരെ കല്ലെറിഞ്ഞു. കല്ലേറിൽ ഒരു മലയാളി മാധ്യമപ്രവർത്തകനും നിരവധി പോലീസുകാർക്കും വനിതാ പ്രതിഷേധക്കാർക്കും പരിക്കേറ്റിട്ടുണ്ട്. അക്രമസംഭവങ്ങളുടെ പശ്ചാത്തലത്തിൽ മുൻകരുതൽ നടപടിയായി ഡൽഹിയിലെ പ്രമുഖ മെട്രോ സ്റ്റേഷനുകൾ താൽക്കാലികമായി അടച്ചുപൂട്ടി. കൂടാതെ, ജന്തർ മന്തർ മേഖലയിൽ ഇന്റർനെറ്റ് സേവനങ്ങളും താൽക്കാലികമായി വിച്ഛേദിച്ചിരിക്കുകയാണ്. പ്രതിഷേധത്തിന് പിന്തുണയുമായി ഭീം ആർമി തലവൻ ചന്ദ്രശേഖർ ആസാദും ജന്തർ മന്തറിൽ എത്തിയിട്ടുണ്ട്.
അതേസമയം, വ്രതാനുഷ്ഠാനത്തെ തുടർന്ന് ചികിത്സയിലുള്ള പ്രമുഖ പരിസ്ഥിതി പ്രവർത്തകൻ സോനം വാങ്ചുക്കിന്റെ ആരോഗ്യനിലയുമായി ബന്ധപ്പെട്ട് പുതിയ മെഡിക്കൽ ബുള്ളറ്റിൻ ഡൽഹി സഫ്ദർജംഗ് ആശുപത്രി അധികൃതർ പുറത്തിറക്കി. അദ്ദേഹത്തിന്റെ ആരോഗ്യനില നിലവിൽ തൃപ്തികരമായി തുടരുകയാണെന്ന് ആശുപത്രി അധികൃതർ അറിയിച്ചു. ആവശ്യമായ എല്ലാ വൈദ്യസഹായങ്ങളും നൽകിവരുന്നുണ്ടെന്നും ആരോഗ്യനില തുടർന്നും നിരീക്ഷിക്കേണ്ടതുണ്ടെന്നും മെഡിക്കൽ ബുള്ളറ്റിനിൽ വ്യക്തമാക്കുന്നു.
