വൈദ്യുതി വാങ്ങൽ കരാർ… സ്വകാര്യ കമ്പനിയായ ജിഎൻഎയ്ക്കെതിരെ….

തിരുവനന്തപുരം: വൈദ്യുതി വാങ്ങുമെന്ന് മുഖ്യമന്ത്രി വി.ഡി. സതീശൻ പ്രഖ്യാപിച്ച സ്വകാര്യ കമ്പനിയായ ജിഎൻഎയ്ക്കെതിരെ ഗുരുതര ആരോപണങ്ങൾ. വിപണിയിലെ രഹസ്യവിവരങ്ങൾ ചോർത്തിയതിന് കമ്പനിക്ക് സെബി പിഴ ചുമത്തിയതിന്റെ രേഖകൾ പുറത്തുവന്നതായാണ് റിപ്പോർട്ട്. അനധികൃത ഇടപാടുകൾ നടത്തിയെന്നാരോപിച്ച് ജിഎൻഎയ്ക്കെതിരെ സെബിക്ക് പരാതിയും ലഭിച്ചിരുന്നു. ഇ-ടെൻഡർ നടപടികൾ പോലും പാലിക്കാതെ സ്വകാര്യ കമ്പനിയുമായി വൈദ്യുതി വാങ്ങൽ കരാറിലേക്ക് നീങ്ങാനുള്ള സർക്കാർ നീക്കത്തിൽ ദുരൂഹതയുണ്ടെന്നാണ് പ്രതിപക്ഷത്തിന്റെ ആരോപണം.

വിപണിയിലെ ക്രമക്കേടുകളുമായി ബന്ധപ്പെട്ട് കേന്ദ്ര റെഗുലേറ്ററി കമ്മീഷന്റെ പിഴയും വിലക്കും നേരിട്ട കമ്പനിയാണ് ജിഎൻഎയെന്നും ആരോപണമുണ്ട്. ഇന്ത്യൻ എനർജി എക്സ്ചേഞ്ച് ലിമിറ്റഡുമായി ബന്ധപ്പെട്ട ഇടപാടുകളിൽ കമ്പനി ക്രമക്കേട് നടത്തിയതായി സെബി നടത്തിയ പരിശോധനയിൽ കണ്ടെത്തിയെന്നാണ് പുറത്തുവന്ന വിവരം. വിപണിയിലെ മാർക്കറ്റ് കപ്ലിങ്ങുമായി ബന്ധപ്പെട്ട അതീവ രഹസ്യ സ്വഭാവമുള്ള ഔദ്യോഗിക വിവരങ്ങൾ 2025ൽ ജിഎൻഎ ചോർത്തിയെന്നും ഇതിലൂടെ വലിയ ലാഭമുണ്ടാക്കിയെന്നുമാണ് ആരോപണം. പരാതികളുടെ അടിസ്ഥാനത്തിൽ സെബി ഇടപെട്ട് നടപടി സ്വീകരിച്ചതായും റിപ്പോർട്ടുകളുണ്ട്. ഇതിന് പുറമെ കേന്ദ്ര റെഗുലേറ്ററി കമ്മീഷനും കമ്പനിക്കെതിരെ പ്രത്യേക അന്വേഷണം നടത്തിയിരുന്നു. ഇത്തരം ആരോപണങ്ങൾ നിലനിൽക്കെയാണ് വൈദ്യുതി വാങ്ങുന്നതുമായി ബന്ധപ്പെട്ട് മുഖ്യമന്ത്രി കമ്പനിയുടെ പേര് പരസ്യമായി പ്രഖ്യാപിച്ചതെന്നാണ് വിമർശനം. മുഖ്യമന്ത്രിയുടെ നിലപാട് വലിയ അഴിമതിയിലേക്ക് വിരൽ ചൂണ്ടുന്നതാണെന്ന് സിപിഐഎം ആരോപിച്ചു. അഞ്ച് ലക്ഷം രൂപയ്ക്ക് മുകളിലുള്ള വൈദ്യുതി വാങ്ങൽ കരാറുകൾക്ക് രാജ്യത്ത് ഇ-ടെൻഡറിങ് നിർബന്ധമാണെന്നാണ് ചൂണ്ടിക്കാട്ടപ്പെടുന്നത്. ഈ നടപടികൾ പാലിക്കാതെ ജിഎൻഎയുമായി സർക്കാർ കൈകോർത്തതിലും പ്രതിപക്ഷം സംശയം ഉന്നയിക്കുന്നുണ്ട്.