കാലടി സർവകലാശാലയിലെ വിദ്യാർഥികളുടെ സസ്പെൻഷൻ… വിദ്യാർഥികളുടെ ഹർജിയിൽ ഇടപെടാതെ…

ഡൽഹി: കാലടി ശ്രീശങ്കരാചാര്യ സംസ്കൃത സർവകലാശാലയിലെ വിദ്യാർഥികളുടെ സസ്പെൻഷനുമായി ബന്ധപ്പെട്ട ഹർജിയിൽ നേരിട്ട് ഇടപെടാതെ സുപ്രീംകോടതി. വിദ്യാർഥികളുടെ ഹർജി അടിയന്തരമായി പരിഗണിക്കാൻ സിംഗിൾ ബെഞ്ചിന് നിർദേശം നൽകി. ഹർജിയിൽ വിദ്യാർഥികൾക്ക് അനുകൂലമായ വിധിയുണ്ടായാൽ പ്രത്യേക പരീക്ഷ നടത്തണമെന്നും കോടതി നിർദേശിച്ചു. ജസ്റ്റിസ് പി.എസ്. നരസിംഹ അധ്യക്ഷനായ ബെഞ്ചാണ് ഹർജി പരിഗണിച്ചത്. വിദ്യാർഥികളുടെ ഹാജർ നില പരിശോധിക്കണമെന്ന് സർവകലാശാല കോടതിയിൽ ആവശ്യപ്പെട്ടു.

അതേസമയം, അന്വേഷണ റിപ്പോർട്ടില്ലാതെ 64 ദിവസം സസ്പെൻഷനിൽ കഴിയേണ്ടിവന്നെന്നാണ് വിദ്യാർഥികളുടെ വാദം. സസ്പെൻഷൻ കാലയളവാണ് ഹാജർ നില കുറയാൻ കാരണമായതെന്നും അതിന്റെ പേരിൽ പരീക്ഷ എഴുതാനുള്ള അവസരം നിഷേധിക്കരുതെന്നും വിദ്യാർഥികൾ ഹർജിയിൽ ചൂണ്ടിക്കാട്ടി. തങ്ങളുടെ പ്രതിഷേധത്തെ തെറ്റായി വ്യാഖ്യാനിച്ചാണ് നടപടിയെടുത്തതെന്നും വിദ്യാർഥികൾ കോടതിയിൽ വാദിച്ചു. സർവകലാശാലയിൽ പാലിക്കേണ്ട അച്ചടക്കമുണ്ടെന്ന് സുപ്രീംകോടതി നിരീക്ഷിച്ചു. അതേസമയം, വിദ്യാർഥികളുടെ ഹർജി അടിയന്തരമായി പരിഗണിച്ച് തീരുമാനമെടുക്കാനാണ് സിംഗിൾ ബെഞ്ചിനോട് നിർദേശിച്ചിരിക്കുന്നത്. നേരത്തെ വിദ്യാർഥികൾക്ക് പരീക്ഷ എഴുതാൻ അനുമതി നൽകിയ സിംഗിൾ ബെഞ്ച് ഉത്തരവ് ഹൈക്കോടതി ഡിവിഷൻ ബെഞ്ച് റദ്ദാക്കിയിരുന്നു.

നടപടിക്രമങ്ങൾ പാലിക്കാതെയാണ് സിംഗിൾ ബെഞ്ച് ഉത്തരവ് പുറപ്പെടുവിച്ചതെന്നായിരുന്നു ഡിവിഷൻ ബെഞ്ചിന്റെ വിലയിരുത്തൽ. ഇതോടെയാണ് വിദ്യാർഥികൾ സുപ്രീംകോടതിയെ സമീപിച്ചത്. ഹർജിയിൽ വിദ്യാർഥികൾ വിജയിച്ചാൽ പ്രത്യേക പരീക്ഷ നടത്തണമെന്ന സുപ്രീംകോടതിയുടെ നിർദേശം കേസിൽ നിർണായകമാണ്. ഇനി സിംഗിൾ ബെഞ്ചിന്റെ പരിഗണനയിലാണ് വിദ്യാർഥികളുടെ പരീക്ഷാ പ്രവേശനവുമായി ബന്ധപ്പെട്ട തുടർനടപടികൾ.