ഫോൺ നമ്പർ മറച്ചുവെച്ച് ഇനി വാട്സ്ആപ്പിൽ ചാറ്റ് ചെയ്യാം; ഉപയോക്താക്കൾ കാത്തിരുന്ന ‘യൂസർനെയിം’ ഫീച്ചർ എത്തുന്നു
ഫോൺ നമ്പർ പങ്കുവയ്ക്കാതെ തന്നെ മറ്റുള്ളവരുമായി ആശയവിനിമയം നടത്താൻ കഴിയുന്ന പുതിയ ”യൂസർനെയിം” സംവിധാനം അവതരിപ്പിക്കാൻ ഒരുങ്ങുകയാണ് വാട്സ്ആപ്പ്. ടെലഗ്രാം, ഇൻസ്റ്റഗ്രാം പോലുള്ള സോഷ്യൽ മീഡിയ പ്ലാറ്റ്ഫോമുകളിലെ രീതിയിലായിരിക്കും ഈ ഫീച്ചർ പ്രവർത്തിക്കുക. ഇതോടെ ഉപയോക്താക്കൾക്ക് സ്വന്തം മൊബൈൽ നമ്പറിന് പകരം ഒരു പ്രത്യേക യൂസർനെയിം പങ്കുവെച്ച് ചാറ്റ് ചെയ്യാൻ സാധിക്കും. ഉപയോക്താക്കൾ ഏറെ നാളായി കാത്തിരുന്ന ഒരു സുപ്രധാന സ്വകാര്യതാ ഫീച്ചറാണിത്.
ഇതുവരെ വാട്സ്ആപ്പിൽ ഒരാളെ ബന്ധപ്പെടാൻ ഫോൺ നമ്പർ നിർബന്ധമായിരുന്നു. അതിനാൽ വ്യക്തിപരമായ നമ്പർ പരിചയമില്ലാത്തവർക്കും നൽകേണ്ട സാഹചര്യം പലപ്പോഴും ഉണ്ടായിരുന്നു. പുതിയ അപ്ഡേറ്റോടെ യൂസർനെയിം വഴി ആളുകളെ കണ്ടെത്താനും ചാറ്റ് ആരംഭിക്കാനും കഴിയുന്നതോടെ സ്വകാര്യതയ്ക്ക് കൂടുതൽ സംരക്ഷണം ലഭിക്കുമെന്നാണ് റിപ്പോർട്ടുകൾ സൂചിപ്പിക്കുന്നത്.
യൂസർനെയിം മാത്രം കാണിക്കും
പുതിയ സംവിധാനത്തിൽ യൂസർനെയിം ഉപയോഗിച്ച് ബന്ധപ്പെടുന്നവർക്ക് മൊബൈൽ നമ്പർ ദൃശ്യമാകില്ല. പകരം ഉപയോക്താവ് തിരഞ്ഞെടുക്കുന്ന യൂസർനെയിം മാത്രമേ മറ്റുള്ളവർക്ക് കാണാൻ സാധിക്കൂ. എന്നാൽ നിലവിലുള്ള രീതിയിൽ ഫോൺ നമ്പർ ഉപയോഗിച്ച് അക്കൗണ്ട് തുടരാൻ ആഗ്രഹിക്കുന്നവർക്ക് അതിന് അവസരം തുടരും. യൂസർനെയിം സംവിധാനം പൂർണമായും ഓപ്ഷണലായിരിക്കും.
എങ്ങനെ യൂസർനെയിം സജ്ജമാക്കാം?
ഫീച്ചർ ലഭ്യമായതിന് ശേഷം വാട്സ്ആപ്പിലെ സെറ്റിംഗ്സിൽ പ്രവേശിച്ച് പ്രൊഫൈൽ വിഭാഗത്തിലൂടെ യൂസർനെയിം സജ്ജീകരിക്കാം. ഇഷ്ടമുള്ള പേര് നൽകുമ്പോൾ അതിന്റെ ലഭ്യത വാട്സ്ആപ്പ് സ്വമേധയാ പരിശോധിക്കും. ലഭ്യമാണെങ്കിൽ സേവ് ചെയ്ത് ഉപയോഗിക്കാം.
നിയമങ്ങളും നിയന്ത്രണങ്ങളും
യൂസർനെയിം മൂന്ന് മുതൽ 35 വരെ അക്ഷരങ്ങൾ ഉൾക്കൊള്ളണം. കുറഞ്ഞത് ഒരു ഇംഗ്ലീഷ് അക്ഷരം നിർബന്ധമാണ്. അക്ഷരങ്ങൾ, അക്കങ്ങൾ, അണ്ടർസ്കോർ (_) എന്നിവയും പിരീഡ് (.) ചിഹ്നവും മാത്രം ഉപയോഗിക്കാൻ കഴിയും.
അതേസമയം, “www” എന്ന് തുടങ്ങുന്ന പേരുകളും .com, .org പോലുള്ള ഡൊമെയ്ൻ എക്സ്റ്റൻഷനുകളിൽ അവസാനിക്കുന്ന പേരുകളും അനുവദിക്കില്ല. തുടക്കത്തിലോ അവസാനത്തിലോ പിരീഡ് ഉപയോഗിക്കാനാവില്ലെന്നും തുടർച്ചയായി രണ്ട് പിരീഡുകൾ ഉപയോഗിക്കാൻ പാടില്ലെന്നും റിപ്പോർട്ടുകളുണ്ട്.
സ്വകാര്യതയ്ക്ക് കൂടുതൽ പ്രാധാന്യം
ഓൺലൈൻ സുരക്ഷയും സ്വകാര്യതയും കൂടുതൽ ചർച്ചയാകുന്ന സാഹചര്യത്തിലാണ് വാട്സ്ആപ്പിന്റെ ഈ നീക്കം. പ്രത്യേകിച്ച് ബിസിനസ് ആവശ്യങ്ങൾക്കായി അന്യരുമായി ഇടപഴകുന്നവർക്ക് ഇത് ഏറെ സഹായകരമാകും. ഓൺലൈൻ വിൽപ്പനക്കാരും കമ്മ്യൂണിറ്റി ഗ്രൂപ്പുകളിലെ അംഗങ്ങളും ഇനി നമ്പർ പുറത്തുവിടാതെ ആശയവിനിമയം നടത്താൻ കഴിയും. സ്പാം കോളുകളും അനാവശ്യ സന്ദേശങ്ങളും കുറയ്ക്കാനും പുതിയ സംവിധാനം സഹായിക്കുമെന്നാണ് വിലയിരുത്തൽ.
നമ്പർ പൂർണമായി ഒഴിവാകില്ല
യൂസർനെയിം സംവിധാനം വന്നാലും അക്കൗണ്ട് സൈൻ-ഇൻ ചെയ്യുന്നതിനും റിക്കവറി ആവശ്യങ്ങൾക്കുമായി ഫോൺ നമ്പർ അക്കൗണ്ടുമായി ബന്ധിപ്പിച്ചുതന്നെയുണ്ടാകും. എന്നാൽ യൂസർനെയിം വഴി ബന്ധപ്പെടുന്നവർക്ക് ആ നമ്പർ കാണാനാകില്ല എന്നതാണ് പ്രധാന മാറ്റം.
വാട്സ്ആപ്പ് ഇതിനകം തന്നെ ചില ആൻഡ്രോയ്ഡ്, ഐഒഎസ് ഉപയോക്താക്കൾക്കായി ഈ ഫീച്ചർ പരീക്ഷണാടിസ്ഥാനത്തിൽ അവതരിപ്പിച്ചിട്ടുണ്ടെന്നാണ് റിപ്പോർട്ടുകൾ. 2026-ൽ കൂടുതൽ ഉപയോക്താക്കൾക്ക് ഇത് ലഭ്യമാകുമെന്നാണ് പ്രതീക്ഷ.
