ശബരിമലയും ഗുരുവായൂരും ‘തിരുപ്പതി മോഡലിൽ’…. സലിം കുമാറിന് കൊച്ചിയിൽ സ്മാരകം… ബജറ്റ് പ്രഖ്യാപനങ്ങളുമായി മുഖ്യമന്ത്രി

സംസ്ഥാനത്തെ തീർത്ഥാടന-വിനോദസഞ്ചാര മേഖലകൾക്കും ജനക്ഷേമത്തിനും സ്ത്രീ-യുവജന സുരക്ഷയ്ക്കും വലിയ പ്രാധാന്യം നൽകിക്കൊണ്ടുള്ള നിർണ്ണായക ബജറ്റ് പ്രഖ്യാപനങ്ങൾ മുഖ്യമന്ത്രി അറിയിച്ചു. ശബരിമല, ഗുരുവായൂർ, കൊട്ടിയൂർ, തിരുവല്ലം എന്നീ പ്രമുഖ ക്ഷേത്രങ്ങളെ തിരുപ്പതി മോഡലിൽ അന്താരാഷ്ട്ര നിലവാരമുള്ള തീർത്ഥാടന കേന്ദ്രങ്ങളായി വികസിപ്പിക്കുമെന്നാണ് ഏറ്റവും പ്രധാനപ്പെട്ട പ്രഖ്യാപനം. തീർത്ഥാടകർക്ക് കൂടുതൽ സൗകര്യങ്ങൾ ഒരുക്കുന്നതിനൊപ്പം ഈ ക്ഷേത്രങ്ങളുടെ പ്രശസ്തി ആഗോളതലത്തിൽ എത്തിക്കുകയാണ് പദ്ധതിയുടെ ലക്ഷ്യം.

സ്ത്രീകൾക്കും കുട്ടികൾക്കുമെതിരായ അതിക്രമങ്ങൾ തടയുന്നതിനായി സംസ്ഥാനത്ത് ‘മകൾക്കൊപ്പം’ എന്ന പേരിൽ പ്രത്യേക പദ്ധതി നടപ്പിലാക്കും. കൂടുതൽ പൊലീസ് സ്റ്റേഷനുകളിൽ വനിതകളെ സ്റ്റേഷൻ ഹൗസ് ഓഫീസർമാരായി നിയമിക്കുമെന്നും മുഖ്യമന്ത്രി വ്യക്തമാക്കി. സംസ്ഥാനത്തെ ക്യാമ്പസുകളിലെ റാഗിംഗ് പൂർണ്ണമായും തുടച്ചുനീക്കുന്നതിനായി അന്തരിച്ച വിദ്യാർത്ഥി സിദ്ധാർത്ഥിന്റെ പേരിൽ പ്രത്യേക പദ്ധതി നടപ്പിലാക്കും. ലഹരി മാഫിയകളെ അടിച്ചമർത്താൻ ലക്ഷ്യമിട്ട് നടപ്പിലാക്കുന്ന ‘ഓപ്പറേഷൻ തൂഫാൻ’ പദ്ധതിക്കായി 10 കോടി രൂപയും ബജറ്റിൽ വകയിരുത്തിയിട്ടുണ്ട്.

ആരോഗ്യരംഗത്ത് വലിയ മാറ്റങ്ങൾക്ക് വഴിതുറക്കുന്നതാണ് ‘ഗോൾഡൻ അവർ പ്രോജക്ട്’. 40 വയസ് കഴിഞ്ഞവർക്ക് വർഷത്തിലൊരിക്കൽ നിർബന്ധിത ആരോഗ്യ പരിശോധന ഉറപ്പാക്കാൻ ആരോഗ്യസ്ഥാപനങ്ങളെ ഏകോപിപ്പിച്ച് ഈ പദ്ധതി നടപ്പിലാക്കും. സർക്കാർ ജീവനക്കാരുടെയും പെൻഷൻകാരുടെയും ആരോഗ്യ ഇൻഷുറൻസ് പദ്ധതിയായ മെഡിസെപ്പിൽ (MEDISEP) സമഗ്ര പരിഷ്കരണം കൊണ്ടുവരുമെന്നും മുഖ്യമന്ത്രി പ്രഖ്യാപിച്ചു. കൂടാതെ, സംസ്ഥാന ജീവനക്കാരുടെ ഡിഎ (DA), പെൻഷൻകാരുടെ ഡിആർ എന്നിവ മുടക്കമില്ലാതെ നൽകുമെന്ന ഉറപ്പും മുഖ്യമന്ത്രി നൽകിയിട്ടുണ്ട്. സമൂഹത്തിലെ ദുർബല വിഭാഗങ്ങളുടെ ക്ഷേമത്തിനായി ‘കരുതൽ മിഷൻ’ പദ്ധതിയും നടപ്പിലാക്കും.

പ്രവാസികളുടെ ക്ഷേമം മുൻനിർത്തി ‘പ്രവാസി ഇൻവെസ്റ്റ്‌മെന്റ് ഫണ്ട്’ രൂപീകരിക്കും. അന്തരിച്ച പ്രശസ്ത ചലച്ചിത്ര നടൻ സലിം കുമാറിന്റെ ഓർമ്മയ്ക്കായി കൊച്ചിയിൽ 1 കോടി രൂപ ചെലവിൽ സ്മാരകം നിർമ്മിക്കുമെന്നും മുഖ്യമന്ത്രി അറിയിച്ചു. കോട്ടയത്ത് കാലങ്ങളായി മുടങ്ങിക്കിടക്കുന്ന സ്കൈവാക്ക് പ്രവൃത്തികൾ പുനരാരംഭിക്കും. തൃശൂരിന്റെ ഹൃദയഭാഗമായ തേക്കിൻകാട് മൈതാനം നവീകരിക്കുന്നതിനായി 10 കോടി രൂപ വകയിരുത്തിയതായും മുഖ്യമന്ത്രി വാർത്താസമ്മേളനത്തിൽ അറിയിച്ചു.