കാറിനുള്ളിൽ അച്ഛനെയും മകനേയും വിഷം കഴിച്ച നിലയിൽ കണ്ടെത്തിയ സംഭവം…മകൻ മരിച്ചു…
തിരുവനന്തപുരം: കാറിനുള്ളിൽ വിഷം കഴിച്ച നിലയിൽ കണ്ടെത്തിയ മകൻ മരിച്ചു. അച്ഛൻ മെഡിക്കൽ കോളെജ് ആശുപത്രിയിൽ ഗുരുതരാവസ്ഥയിൽ. പള്ളിച്ചൽ നരുവാമൂട് പാലോട്ടുകോണം പണ്ടാരവിള ആതിര ഭവനിൽ അഖിൽ (28) ആണ് മരിച്ചത്. അച്ഛൻ വേണുഗോപാലൻ നായർ (62) ഗുരുതരാവസ്ഥയിൽ ആശുപത്രിയിൽ തീവ്രപരിചരണ വിഭാഗത്തിൽ തുടരുകയാണ്. ശനിയാഴ്ച വൈകുന്നേരമാണ് പ്രാവച്ചമ്പലത്തിന് സമീപത്ത് വെച്ച് അച്ഛനെയും മകനെയും നുരയും പതയും വന്ന നിലയിൽ നാട്ടുകാർ കണ്ടെത്തുന്നത്.
ഉടനെ നേമം താലൂക്ക് ആശുപത്രിയിലും പിന്നീട് മെഡിക്കൽ കോളേജ് ആശുപത്രിയിലുമെത്തിച്ചെങ്കിലും രാത്രിയോടെ അഖിൽ മരണപ്പെടുകയായിരുന്നു. ഡ്രൈവറായിരുന്നു അഖിൽ. അച്ഛൻ വേണുഗോപാലൻ നായർ കർഷകനാണ്. മരണ കാരണം വ്യക്തമല്ലെന്നും കേസെടുത്ത് അന്വേഷണം നടത്തുകയാണെന്നും നരുവാമ്മൂട് പൊലീസ് പറഞ്ഞു.സംഭവത്തിൽ മൊഴിയെടുക്കാൻ ശ്രമിച്ചെങ്കിലും വേണുഗോപാലൻ നായർ അബോധാവസ്ഥയിലായതിനാൽ വിവരം ഒന്നും ലഭിച്ചില്ല. മറ്റ് ബന്ധുക്കളോടുൾപ്പടെ വിവരം അന്വേഷിക്കുന്നതായി പൊലീസ് പറയുന്നു.
