ജാമ്യത്തിലിറങ്ങി വിചാരണയ്ക്ക് ഹാജരാകാതെ മുങ്ങിയ പോക്‌സോ കേസ് പ്രതി..
ജാമ്യത്തിലിറങ്ങിയ ശേഷം വിചാരണ നടപടികൾക്ക് കോടതിയിൽ ഹാജരാകാതെ ഒളിവിൽ കഴിഞ്ഞ പോക്‌സോ കേസ് പ്രതിയെ മലപ്പുറം പൊലീസ് തമിഴ്നാട്ടിൽ നിന്ന് പിടികൂടി. അസം നാഗോൺ സ്വദേശിയായ അലീമുൽ ഹഖിനെയാണ് കോയമ്പത്തൂർ ജില്ലയിൽ നിന്ന് അറസ്റ്റ് ചെയ്തത്. മലപ്പുറം പൊലീസ് രജിസ്റ്റർ ചെയ്ത പോക്‌സോ കേസിലെ പ്രതിയാണ് ഇയാൾ.
കേസിൽ ജാമ്യം ലഭിച്ചതിനെ തുടർന്ന് പുറത്തിറങ്ങിയ അലീമുൽ ഹഖ് പിന്നീട് കോടതി നടപടികളിൽ നിന്ന് വിട്ടുനിൽക്കുകയായിരുന്നു. വിചാരണയുടെ വിവിധ ഘട്ടങ്ങളിൽ കോടതിയിൽ ഹാജരാകാൻ നിർദേശിച്ചിട്ടും ഇയാൾ എത്തിയിരുന്നില്ല. ഇതേത്തുടർന്ന് മഞ്ചേരി സ്‌പെഷ്യൽ കോടതി പ്രതിക്കെതിരെ അറസ്റ്റ് വാറണ്ട് പുറപ്പെടുവിച്ചു. തുടർന്ന് ഇയാളെ കണ്ടെത്തുന്നതിനായി പൊലീസ് അന്വേഷണം ആരംഭിച്ചു.
പ്രതി ഒളിവിൽ കഴിയുന്ന സ്ഥലത്തെ കുറിച്ച് ലഭിച്ച വിവരങ്ങളുടെ അടിസ്ഥാനത്തിൽ മലപ്പുറം പൊലീസ് അന്വേഷണം തമിഴ്നാട്ടിലേക്കും വ്യാപിപ്പിച്ചു. തുടർന്നാണ് കോയമ്പത്തൂർ ജില്ലയിലെ തൊണ്ടമുതൂരിൽ ഇയാൾ കഴിയുന്നതായി കണ്ടെത്തിയത്. പൊലീസ് സംഘം സ്ഥലത്തെത്തി നടത്തിയ പരിശോധനയിലാണ് അലീമുൽ ഹഖിനെ പിടികൂടിയത്. കോടതിയിൽ ഹാജരാകാതെ ഒളിവിൽ കഴിയുന്ന പ്രതികളെ കണ്ടെത്തുന്നതിനും നിയമ നടപടികൾക്ക് വിധേയരാക്കുന്നതിനുമുള്ള അന്വേഷണത്തിന്റെ ഭാഗമായാണ് അറസ്റ്റ്. തമിഴ്നാട്ടിൽനിന്ന് കസ്റ്റഡിയിലെടുത്ത പ്രതിയെ തുടർനിയമ നടപടികൾക്കായി കോടതിയിൽ ഹാജരാക്കി.
