ആർത്തവസമയത്ത് ടാറ്റൂ ചെയ്യുന്നത് സുരക്ഷിതമാണോ? വേദന കൂടുമോ? അറിയാം ഇക്കാര്യങ്ങൾ

ആർത്തവസമയത്ത് ടാറ്റൂ ചെയ്യാമോ? ആദ്യമായി ആർത്തവം തുടങ്ങിയ പെൺകുട്ടികൾക്ക് ടാറ്റൂ ചെയ്യുന്നത് സുരക്ഷിതമാണോ? പലരുടെയും മനസ്സിലുള്ള സംശയങ്ങളാണിവ. ആർത്തവവും ടാറ്റൂ ചെയ്യുന്നതും തമ്മിൽ നേരിട്ട് ബന്ധപ്പെടുത്തി ടാറ്റൂ ഒഴിവാക്കണമെന്ന് നിർദേശിക്കുന്ന പൊതുവായ ആരോഗ്യനിയമമില്ല. എന്നിരുന്നാലും, ആർത്തവചക്രത്തിന്റെ വിവിധ ഘട്ടങ്ങളിൽ ശരീരത്തിലുണ്ടാകുന്ന ഹോർമോൺ വ്യതിയാനങ്ങളും വേദനയോടുള്ള പ്രതികരണവും ടാറ്റൂ ചെയ്യുന്ന അനുഭവത്തെ സ്വാധീനിച്ചേക്കാം. അതിനാൽ ടാറ്റൂ ചെയ്യാൻ തീരുമാനിക്കുന്നതിന് മുൻപ് ചില കാര്യങ്ങൾ അറിഞ്ഞിരിക്കേണ്ടതുണ്ട്.

വേദനയുടെ തീവ്രത

ആർത്തവസമയത്തോ അതിന് തൊട്ടുമുൻപോ ടാറ്റൂ ചെയ്യുമ്പോൾ ചില സ്ത്രീകൾക്ക് കൂടുതൽ വേദന അനുഭവപ്പെടാറുണ്ട്. ആർത്തവചക്രത്തിന്റെ വിവിധ ഘട്ടങ്ങളിൽ ഈസ്ട്രജൻ ഉൾപ്പെടെയുള്ള ഹോർമോണുകളുടെ അളവിൽ മാറ്റമുണ്ടാകുന്നു. ഈ ഹോർമോൺ വ്യതിയാനങ്ങൾ വേദനയോടുള്ള ശരീരത്തിന്റെ സംവേദനക്ഷമതയെ സ്വാധീനിക്കാമെന്നാണ് ചില പഠനങ്ങൾ സൂചിപ്പിക്കുന്നത്. അതിനാൽ ആർത്തവസമയത്ത് ടാറ്റൂ സൂചി കുത്തുമ്പോഴുള്ള വേദന പതിവിലും ശക്തമായി അനുഭവപ്പെടാൻ സാധ്യതയുണ്ട്.

‘പെയിൻ’ എന്ന ജേണലിൽ പ്രസിദ്ധീകരിച്ച പഠനത്തിലും ആർത്തവചക്രത്തിന്റെ വിവിധ ഘട്ടങ്ങളിൽ സ്ത്രീകളുടെ വേദനാനുഭവത്തിൽ വ്യത്യാസമുണ്ടാകാമെന്ന് ചൂണ്ടിക്കാട്ടിയിട്ടുണ്ട്. എന്നാൽ എല്ലാവർക്കും ഒരേ രീതിയിലായിരിക്കണമെന്നില്ല.

വീക്കവും വേദനയും

ആർത്തവസമയത്ത് ശരീരത്തിൽ പ്രോസ്റ്റാഗ്ലാൻഡിൻ എന്ന രാസസംയുക്തങ്ങളുടെ ഉൽപാദനം വർധിക്കുന്നു. ഗർഭാശയപേശികളുടെ സങ്കോചത്തിന് കാരണമാകുന്ന ഇവയാണ് ആർത്തവവേദനയ്ക്കും വയറിലെ അസ്വസ്ഥതകൾക്കും പ്രധാന കാരണം. ഇവ വേദനയോടുള്ള ശരീരത്തിന്റെ പ്രതികരണത്തെയും സ്വാധീനിച്ചേക്കാം. അതിനാൽ ഈ സമയത്ത് ടാറ്റൂ ചെയ്യുമ്പോൾ ചെറിയ അസ്വസ്ഥതകൾ പോലും കൂടുതൽ ശക്തമായി അനുഭവപ്പെടാൻ സാധ്യതയുണ്ട്.

ക്ഷീണവും അസ്വസ്ഥതയും

ആർത്തവസമയത്ത് വയറുവേദന, മൂഡ് മാറ്റങ്ങൾ, ക്ഷീണം, തലവേദന തുടങ്ങിയ ബുദ്ധിമുട്ടുകൾ ചിലരിൽ ഉണ്ടാകാറുണ്ട്. ഇത്തരം അസ്വസ്ഥതകൾ അനുഭവപ്പെടുന്ന സമയത്ത് മണിക്കൂറുകളോളം ഒരേ ഇരിപ്പിലിരുന്ന് ടാറ്റൂ ചെയ്യുന്നത് കൂടുതൽ പ്രയാസകരമായേക്കാം. അതിനാൽ ശരീരത്തിന്റെ അവസ്ഥ കൂടി പരിഗണിച്ചുവേണം സമയം തീരുമാനിക്കാൻ.

രക്തസ്രാവം

ആർത്തവസമയമായതുകൊണ്ട് ടാറ്റൂ ചെയ്യുന്ന ഭാഗത്തുനിന്ന് നിർബന്ധമായും കൂടുതൽ രക്തസ്രാവമുണ്ടാകണമെന്നില്ല. എന്നാൽ ആർത്തവവേദന കുറയ്ക്കാൻ ഉപയോഗിക്കുന്ന ഐബുപ്രൂഫിൻ പോലുള്ള ചില മരുന്നുകൾ രക്തത്തിലെ പ്ലേറ്റ്ലെറ്റുകളുടെ പ്രവർത്തനത്തെ സ്വാധീനിക്കുകയും രക്തസ്രാവസാധ്യത വർധിപ്പിക്കുകയും ചെയ്യാം. അതിനാൽ ഇത്തരം മരുന്നുകൾ കഴിക്കുന്നവർ ടാറ്റൂ ചെയ്യുന്നതിന് മുൻപ് ഡോക്ടറുടെ ഉപദേശം തേടുന്നത് നല്ലതാണ്. ഡോക്ടറുടെ നിർദേശമില്ലാതെ മരുന്നുകൾ സ്വയം നിർത്തരുത്.

ശരീരത്തിലെ ജലാംശം

ആർത്തവചക്രത്തിനിടെ ശരീരത്തിലെ ദ്രാവകസന്തുലിതാവസ്ഥയിൽ മാറ്റങ്ങളുണ്ടാകാം. നിർജലീകരണം അനുഭവപ്പെടുമ്പോൾ ക്ഷീണവും അസ്വസ്ഥതയും വർധിക്കാം. ഇത് ടാറ്റൂ ചെയ്യുമ്പോഴുള്ള അനുഭവത്തെയും ബാധിച്ചേക്കാം. അതിനാൽ ടാറ്റൂ ചെയ്യുന്നതിന് മുൻപും ശേഷവും ആവശ്യത്തിന് വെള്ളം കുടിക്കുകയും ശരീരത്തിൽ ജലാംശം നിലനിർത്തുകയും വേണം.

ടാറ്റൂ ചെയ്യുമ്പോഴുള്ള വേദന ഓരോ വ്യക്തിയിലും വ്യത്യസ്തമായിരിക്കും. ഹോർമോൺ വ്യതിയാനങ്ങൾ, മാനസിക സമ്മർദം, ക്ഷീണം, വേദന സഹിക്കാനുള്ള വ്യക്തിഗത ശേഷി തുടങ്ങിയ ഘടകങ്ങൾ ഇതിനെ സ്വാധീനിക്കാം. ആർത്തവസമയത്ത് ടാറ്റൂ ചെയ്യുന്നത് പൊതുവെ ഒഴിവാക്കേണ്ടതില്ലെങ്കിലും, കഠിനമായ വേദനയോ ക്ഷീണമോ അനുഭവപ്പെടുന്നുണ്ടെങ്കിൽ മറ്റൊരു ദിവസം തിരഞ്ഞെടുക്കുന്നതാണ് ഉചിതം.

ടാറ്റൂ ചെയ്യുന്നതിന് മുൻപ് ശ്രദ്ധിക്കേണ്ട കാര്യങ്ങൾ

പ്രായപരിധി: ടാറ്റൂ ചെയ്യുന്നതിനുള്ള കുറഞ്ഞ പ്രായപരിധി രാജ്യങ്ങളിലെയും പ്രദേശങ്ങളിലെയും നിയമങ്ങൾക്കനുസരിച്ച് വ്യത്യാസപ്പെടാം. പല സ്ഥലങ്ങളിലും 18 വയസാണ് നിശ്ചയിച്ചിട്ടുള്ളത്. പ്രായപൂർത്തിയാകാത്തവർക്ക് ടാറ്റൂ ചെയ്യുന്നതുമായി ബന്ധപ്പെട്ട നിയമങ്ങളും രക്ഷിതാക്കളുടെ അനുമതി സംബന്ധിച്ച വ്യവസ്ഥകളും മുൻകൂട്ടി മനസ്സിലാക്കണം.

ആരോഗ്യസുരക്ഷ: ശുചിത്വം കൃത്യമായി പാലിക്കുന്നതും അംഗീകൃതവുമായ ടാറ്റൂ സ്റ്റുഡിയോ മാത്രം തിരഞ്ഞെടുക്കുക. അണുവിമുക്തമാക്കിയ ഉപകരണങ്ങളും ഓരോരുത്തർക്കും പുതിയ സൂചികളും ഉപയോഗിക്കുന്നുണ്ടെന്ന് ഉറപ്പാക്കണം. ടാറ്റൂ ചെയ്യുന്ന വ്യക്തി കൈയുറകൾ ധരിക്കുന്നുണ്ടെന്നും ഉപകരണങ്ങൾ ശരിയായ രീതിയിൽ അണുവിമുക്തമാക്കുന്നുണ്ടെന്നും ശ്രദ്ധിക്കുക. ചർമ്മത്തിൽ മുറിവോ അണുബാധയോ ഉള്ളപ്പോൾ ടാറ്റൂ ചെയ്യുന്നത് ഒഴിവാക്കണം.