സംസ്ഥാനത്തെ സർക്കാർ ആശുപത്രികളിൽ 450 കോടി രൂപയുടെ… ആരോഗ്യ സെക്രട്ടറിയുടെ ഞെട്ടിക്കുന്ന റിപ്പോർട്ട്
തിരുവനന്തപുരം: സംസ്ഥാനത്തെ സർക്കാർ ആശുപത്രികളിൽ 450 കോടി രൂപയുടെ മെഡിക്കൽ ഉപകരണങ്ങൾ ഉപയോഗിക്കാതെ കെട്ടിക്കിടക്കുന്നതായി ആരോഗ്യ സെക്രട്ടറിയുടെ ഞെട്ടിക്കുന്ന റിപ്പോർട്ട്. കോടിക്കണക്കിന് രൂപയുടെ ഉപകരണങ്ങൾ പെട്ടി പോലും പൊട്ടിക്കാതെയാണ് വിവിധ ആശുപത്രികളിൽ അനാഥമായി കിടക്കുന്നത്. വെന്റിലേറ്ററുകൾ, ഡിജിറ്റൽ എക്സ്-റേ, മാമോഗ്രാം മെഷീനുകൾ, ഡയാലിസിസ് മെഷീനുകൾ എന്നിവയാണ് ഇത്തരത്തിൽ ഉപയോഗിക്കാത്ത നിലയിൽ കണ്ടെത്തിയിരിക്കുന്നത്.
കഴിഞ്ഞ പത്തു വർഷത്തിനിടെ മൂന്നു ലക്ഷം രൂപയ്ക്ക് മുകളിൽ വില വരുന്ന ഉപകരണങ്ങൾ വാങ്ങിയതിന്റെ കണക്കുകളാണ് ഇപ്പോൾ പുറത്തുവന്നിരിക്കുന്നത്. മുൻപ് കെ.എം.എസ്.സി.എൽ (KMSCL) വാങ്ങിക്കൂട്ടിയ കോടിക്കണക്കിന് രൂപയുടെ മരുന്നുകൾ ഉപയോഗശൂന്യമായി നശിച്ച വിവരം പുറത്തുവന്ന് അന്വേഷണം പുരോഗമിക്കുന്നതിനിടയിലാണ് മെഡിക്കൽ ഉപകരണങ്ങളുടെ ദുരുപയോഗം സംബന്ധിച്ചും റിപ്പോർട്ട് പുറത്തുവന്നിരിക്കുന്നത്. സംഭവത്തിൽ വിശദമായ അന്വേഷണം നടത്താൻ ആരോഗ്യ മന്ത്രി കെ. മുരളീധരൻ നിർദേശം നൽകി. ഉപകരണങ്ങൾ വാങ്ങി ഉപയോഗിക്കാതെ ഭദ്രമായി വെച്ചതിന് പിന്നിലെ കാരണം സമഗ്രമായി അന്വേഷിക്കുമെന്ന് മന്ത്രി വ്യക്തമാക്കി.
ആരോഗ്യവകുപ്പിനെ വെള്ളാനയാക്കി മാറ്റുന്ന ചിലർ വകുപ്പിലുണ്ടെന്നും, ഓരോരുത്തരെയായി കണ്ടുപിടിച്ച് കർശന നടപടി സ്വീകരിക്കുമെന്നും മന്ത്രി മുന്നറിയിപ്പ് നൽകി. എൻ.എച്ച്.എം (NHM), ഡി.എം.ഇ (DME) എന്നിവർ വാങ്ങിയ ഉപകരണങ്ങളുടെ കണക്കുകൾ കൂടി ശേഖരിക്കാനും, മൂന്നു ലക്ഷം രൂപയിൽ താഴെയുള്ള ഉപകരണങ്ങളെക്കുറിച്ചും അന്വേഷണം നടത്താൻ മന്ത്രി നിർദേശം നൽകിയിട്ടുണ്ട്.
