സുരേഷ് ബാബുവിനെതിരായ ആരോപണം: പിണറായി വിജയനെയും എം.വി. ഗോവിന്ദനെയും പ്രതിചേർക്കണമെന്ന്…
കൊച്ചി: സിപിഐഎം പാലക്കാട് ജില്ലാ മുൻ സെക്രട്ടറി ഇ.എൻ. സുരേഷ് ബാബുവിന് എതിരെയുള്ള മോശം പെരുമാറ്റ ആരോപണത്തിൽ പ്രതിപക്ഷനേതാവ് പിണറായി വിജയനെയും സംസ്ഥാന സെക്രട്ടറി എം.വി. ഗോവിന്ദനെയും പ്രതിചേർക്കണമെന്ന് ആവശ്യപ്പെട്ട് പരാതി. കെ.പി.സി.സി സെക്രട്ടറി ജോൺ ഡാനിയലാണ് മുഖ്യമന്ത്രിക്ക് പരാതി നൽകിയിരിക്കുന്നത്. പരാതി സംബന്ധിച്ച് അറിവുണ്ടായിട്ടും ആ വിവരം പൊലീസിന് കൈമാറിയില്ലെന്നാണ് പ്രധാന ആരോപണം.
ഇ.എൻ. സുരേഷ് ബാബുവിനെതിരെയുള്ള പരാതിയിൽ പൊതുതാത്പര്യ പ്രകാരം കർശന നിയമനടപടി സ്വീകരിക്കണമെന്നും പരാതിയിൽ ആവശ്യപ്പെടുന്നുണ്ട്. സംഭവത്തിൽ സമഗ്രമായ പൊലീസ് അന്വേഷണം വേണമെന്ന ആവശ്യവുമായി കോൺഗ്രസും ബിജെപിയും ഇതിനകം രംഗത്തുവന്നിട്ടുണ്ട്. ജില്ലാ സെക്രട്ടറി സ്ഥാനത്തുനിന്ന് നീക്കിയെങ്കിലും, സുരേഷ് ബാബു ജില്ലാ സെക്രട്ടറിയേറ്റിലും സംസ്ഥാന സമിതിയിലും തുടരുന്ന സാഹചര്യമാണ് പാർട്ടിക്ക് വലിയ തലവേദനയായിരിക്കുന്നത്. ആരോപണങ്ങൾ പുറത്തുവന്നതിന് പിന്നാലെ കോൺഗ്രസും ബിജെപിയും പ്രതിചേർക്കൽ ഉൾപ്പെടെയുള്ള ആവശ്യങ്ങളുമായി രംഗത്തെത്തിയത് സിപിഐഎമ്മിനെ കൂടുതൽ പ്രതിരോധത്തിലാക്കി. വിഷയത്തിൽ പ്രതിപക്ഷ നേതാവ് പിണറായി വിജയൻ ഇതുവരെ പ്രതികരിച്ചിട്ടില്ല.
