പൊന്നാനി ബിനാലെക്ക് മെസ്സിയും ഷാരൂഖ് ഖാനും എത്തും… ഡയറക്ടറായി മോഹൻലാൽ… 75% ഉറപ്പെന്ന് എംഎൽഎ

പൊന്നാനി: വരാനിരിക്കുന്ന പൊന്നാനി ബിനാലെയിലേക്ക് ലോക ഫുട്ബോൾ ഇതിഹാസം ലയണൽ മെസ്സിയെയും ബോളിവുഡ് ബാദ്ഷാ ഷാരൂഖ് ഖാനെയും എത്തിക്കാൻ ആലോചനയുള്ളതായി പൊന്നാനി എംഎൽഎ കെ.പി. നൗഷാദലി. മെസ്സിക്കും ഷാരൂഖ് ഖാനും പുറമെ പ്രശസ്ത ഗായിക ശ്രേയാ ഘോഷാൽ, ന്യൂയോർക്ക് മേയർ സൊഹ്റാൻ മംദാനി എന്നിവരെയും പൊന്നാനിയിലെത്തിക്കാൻ ആലോചിക്കുന്നുണ്ടെന്ന് എംഎൽഎ വ്യക്തമാക്കി.പൊന്നാനിയിൽ നടന്ന ഒരു കുടുംബസംഗമത്തിൽ പങ്കെടുത്ത് സംസാരിക്കവെയാണ് എംഎൽഎയുടെ ഈ വമ്പൻ പ്രഖ്യാപനം. ബിനാലെയുടെ ഡയറക്ടർ സ്ഥാനത്തേക്ക് മലയാളത്തിന്റെ സൂപ്പർസ്റ്റാർ മോഹൻലാലിനെ കൊണ്ടുവരാനുള്ള ആലോചനകൾ നടക്കുന്നുണ്ടെന്നും അദ്ദേഹം കൂട്ടിച്ചേർത്തു. തുടക്കത്തിൽ കേൾക്കുമ്പോൾ അവിശ്വസനീയമായി തോന്നാമെങ്കിലും ഈ പദ്ധതികൾ താൻ വെറുതെ പറയുന്നതല്ലെന്ന് കെ.പി. നൗഷാദലി ഓർമ്മിപ്പിച്ചു. നേരത്തെ എൽഡിഎഫ് സർക്കാർ അധികാരത്തിലിരുന്ന സമയത്ത് അന്നത്തെ കായികവകുപ്പ് മന്ത്രിയായിരുന്ന വി. അബ്ദുറഹിമാൻ ലയണൽ മെസ്സിയെയും അർജന്റീന ഫുട്ബോൾ ടീമിനെയും കേരളത്തിലെത്തിക്കുമെന്ന് സമാനമായ രീതിയിൽ വലിയ വാഗ്ദാനം നൽകിയിരുന്നു. എന്നാൽ സാമ്പത്തിക-സാങ്കേതിക കാരണങ്ങളാൽ അത് നടക്കാതെ പോവുകയും വലിയ രീതിയിലുള്ള രാഷ്ട്രീയ വിവാദങ്ങൾക്കും ട്രോളുകൾക്കും അത് വഴിവെക്കുകയും ചെയ്തിരുന്നു. ഈ പശ്ചാത്തലത്തിലാണ് ഇപ്പോൾ പൊന്നാനി ബിനാലെയുടെ പേരിൽ മെസ്സിയെയും മറ്റ് ആഗോള പ്രമുഖരെയും മണ്ഡലത്തിലേക്ക് എത്തിക്കുമെന്ന പുതിയ യുഡിഎഫ് എംഎൽഎയുടെ പ്രഖ്യാപനം പുറത്തുവരുന്നത്. എംഎൽഎയുടെ ഈ പുതിയ പ്രഖ്യാപനം മലപ്പുറം ജില്ലയിലെ ഫുട്ബോൾ-കലാ പ്രേമികൾക്കിടയിൽ വലിയ ആവേശവും ഒപ്പം കൗതുകവും സൃഷ്ടിച്ചിട്ടുണ്ട്. വരും ദിവസങ്ങളിൽ ഈ വിഷയത്തിൽ കൂടുതൽ വ്യക്തത വരുത്തുമെന്നാണ് എംഎൽഎയുമായി അടുത്ത വൃത്തങ്ങൾ നൽകുന്ന സൂചന.