കേരളത്തെ അഴിമതിമുക്തമാക്കാൻ ‘പ്രോജക്ട് സീറോ’… അഴിമതിക്കാരായ നേതാക്കളും ഉദ്യോഗസ്ഥരും വിജിലൻസ് നിരീക്ഷണത്തിലെന്ന് മന്ത്രി രമേശ് ചെന്നിത്തല
തിരുവനന്തപുരം: സംസ്ഥാനത്തെ പരിപൂർണമായി അഴിമതിവിമുക്തമാക്കുകയെന്ന ലക്ഷ്യത്തോടെ പുതിയ കർമ്മപദ്ധതി പ്രഖ്യാപിച്ച് ആഭ്യന്തര മന്ത്രി രമേശ് ചെന്നിത്തല. ‘പ്രോജക്ട് സീറോ’ എന്ന് പേരിട്ടിരിക്കുന്ന ഈ പുതിയ പദ്ധതി വഴി സർക്കാർ ഓഫീസുകളിൽ പാവപ്പെട്ട ജനങ്ങൾക്ക് കൈമടക്ക് നൽകാതെ സേവനങ്ങൾ ലഭ്യമാക്കുമെന്ന് അദ്ദേഹം വാർത്താസമ്മേളനത്തിൽ അറിയിച്ചു. ഈ പദ്ധതി ഭരണരംഗത്ത് വലിയൊരു വിപ്ലവമായിരിക്കുമെന്നും മന്ത്രി കൂട്ടിച്ചേർത്തു.
അഴിമതി തുടച്ചുനീക്കാൻ വിപുലമായ സംവിധാനങ്ങളാണ് പ്രോജക്ട് സീറോയിലൂടെ ആഭ്യന്തര വകുപ്പ് ലക്ഷ്യമിടുന്നത്. എവിടെയെങ്കിലും അഴിമതിയോ കൈക്കൂലിയോ കണ്ടാൽ അത് ഉടനടി അധികൃതരെ അറിയിക്കാൻ പൊതുജനങ്ങൾക്ക് പ്രത്യേക സംവിധാനം ഒരുക്കും. ഇങ്ങനെ വിവരങ്ങൾ കൈമാറുന്ന പൊതുജനങ്ങളുടെ പേരോ മറ്റ് വിവരങ്ങളോ യാതൊരു കാരണവശാലും പുറത്തുവിടില്ലെന്നും അവർക്ക് പൂർണ്ണ സുരക്ഷിതത്വം ഉറപ്പാക്കുമെന്നും മന്ത്രി വ്യക്തമാക്കി.
‘പ്രോജക്ട് സീറോ’ പദ്ധതിയുടെ പ്രധാന ലക്ഷ്യങ്ങൾ…
- സംസ്ഥാനത്തെ പൂർണ്ണമായും അഴിമതിവിമുക്തമാക്കുക.
- സർക്കാർ ഓഫീസുകളിൽ നിന്ന് കൈക്കൂലിയില്ലാതെ പാവപ്പട്ടവർക്ക് സേവനങ്ങൾ ഉറപ്പാക്കുക.
- അഴിമതിക്കാരായ നേതാക്കളെയും ഉദ്യോഗസ്ഥരെയും വിജിലൻസ് കർശനമായി നിരീക്ഷിക്കുക.
- ആധുനിക സാങ്കേതികവിദ്യ ഉപയോഗിച്ച് അഴിമതി തടയുകയും ട്രാപ്പ് കേസുകൾ വർദ്ധിപ്പിക്കുകയും ചെയ്യുക.
അഴിമതി ഇല്ലാതാക്കണമെങ്കിൽ കക്ഷി രാഷ്ട്രീയ വ്യത്യാസമന്യേ ജനങ്ങളുടെ പൂർണ്ണമായ സഹകരണം ആവശ്യമാണെന്ന് രമേശ് ചെന്നിത്തല ഓർമ്മിപ്പിച്ചു. ആധുനിക സാങ്കേതികവിദ്യയുടെ സഹായത്തോടെ അഴിമതി തടയുന്നതിനൊപ്പം വിജിലൻസ് നടത്തുന്ന ട്രാപ്പ് കേസുകളുടെ എണ്ണം വർദ്ധിപ്പിക്കാനും നിർദ്ദേശം നൽകിയിട്ടുണ്ട്. ഇതിന്റെ ഭാഗമായി വിജിലൻസ് മാനുവൽ പരിഷ്കരിക്കുമെന്നും അതിന്റെ ഡ്രാഫ്റ്റ് നിലവിൽ തയ്യാറായിക്കഴിഞ്ഞതായും ആഭ്യന്തര മന്ത്രി വാർത്താസമ്മേളനത്തിൽ വ്യക്തമാക്കി.
