വിഷു ബമ്പർ അടിച്ചത് കരുനാഗപ്പള്ളിയിലെ ലോട്ടറി വില്പനക്കാരന്…. 12 കോടിയുടെ ഭാഗ്യവാൻ പൊന്നൻ
കൊല്ലം: സംസ്ഥാന ഭാഗ്യക്കുറി വകുപ്പിന്റെ ഈ വർഷത്തെ വിഷു ബമ്പർ ഒന്നാം സമ്മാനമായ 12 കോടി രൂപ കൊല്ലം സ്വദേശിക്ക്. കരുനാഗപ്പള്ളി സ്വദേശിയായ പൊന്നൻ എന്ന ലോട്ടറി വില്പനക്കാരനാണ് കോടീശ്വരനായ ആ മഹാഭാഗ്യവാൻ. VB 135452 എന്ന നമ്പറിലുള്ള ടിക്കറ്റിനാണ് ഒന്നാം സമ്മാനം അടിച്ചിരിക്കുന്നത്. ഒരു ലോട്ടറി വില്പനക്കാരന് തന്നെ കോടികളുടെ ബമ്പർ സമ്മാനം അടിച്ചെന്ന വാർത്ത വലിയ ആവേശത്തോടെയാണ് നാടൊട്ടുക്കും ജനങ്ങൾ ഏറ്റെടുത്തിരിക്കുന്നത്.
ലോട്ടറി ടിക്കറ്റുകൾ വിറ്റ് ഉപജീവനം നടത്തുന്ന പൊന്നന് തന്റെ ജീവിതത്തിൽ ആദ്യമായാണ് ഇത്രയും വലിയൊരു തുക സമ്മാനമായി ലഭിക്കുന്നത്. സമ്മാനാർഹനായ വിവരം അറിഞ്ഞതിന് പിന്നാലെ വലിയ സന്തോഷമുണ്ടെന്ന് പൊന്നൻ മാധ്യമങ്ങളോട് പ്രതികരിച്ചു. ലോട്ടറി അടിച്ച തുക എന്ത് ചെയ്യണം, സമ്മാനത്തുക കൈപ്പറ്റുന്നതിനുള്ള തുടർനടപടികൾ എങ്ങനെ വേണം തുടങ്ങിയ കാര്യങ്ങളെല്ലാം കുടുംബാംഗങ്ങളുമായി ആലോചിച്ച് മാത്രമേ തീരുമാനിക്കൂ എന്നും അദ്ദേഹം വ്യക്തമാക്കി.
