രാഹുൽ മാങ്കൂട്ടത്തിലിനെതിരായ കേസ്: “മൃതദേഹത്തിനുള്ള അന്തസ്സ് പോലും എനിക്കില്ലേ?”….. മുഖ്യമന്ത്രിക്കും ആഭ്യന്തരമന്ത്രിക്കും കത്തയച്ച് അതിജീവിത
തിരുവനന്തപുരം: യൂത്ത് കോൺഗ്രസ് നേതാവ് രാഹുൽ മാങ്കൂട്ടത്തിലിനെതിരായ ലൈംഗികാരോപണ കേസിൽ സംസ്ഥാന സർക്കാരിന്റെയും ആഭ്യന്തര വകുപ്പിന്റെയും അടിയന്തര ഇടപെടൽ ആവശ്യപ്പെട്ട് അതിജീവിത. കേസ് അട്ടിമറിക്കാൻ നീക്കം നടക്കുന്നുവെന്ന് ആരോപിച്ചും താൻ നേരിടുന്ന സൈബർ അക്രമങ്ങൾ ചൂണ്ടിക്കാട്ടിയും മുഖ്യമന്ത്രിക്കും ആഭ്യന്തരമന്ത്രി രമേശ് ചെന്നിത്തലയ്ക്കുമാണ് അതിജീവിത കത്തയച്ചത്. ഏറെ വൈകാരികമായ പരാമർശങ്ങളാണ് കത്തിലുള്ളത്. ഒരു മനുഷ്യന്റെ മൃതദേഹത്തിന് പോലും ആദരവിനും അന്തസ്സിനും അവകാശമുണ്ടെന്നിരിക്കെ, ജീവിച്ചിരിക്കുന്ന താൻ പൊതുസമൂഹത്തിൽ നിരന്തരം അപമാനിക്കപ്പെടുകയാണെന്ന് അതിജീവിത കത്തിൽ വേദനയോടെ കുറിച്ചു.
കേസിലെ ഒന്നാം പ്രതിയായ രാഹുൽ മാങ്കൂട്ടത്തിലിനെ പിന്തുണച്ചും തന്നെയധിക്ഷേപിച്ചും ദീപ ജോസഫ് എന്ന വ്യക്തി നടത്തുന്ന പരസ്യ പ്രതികരണങ്ങൾക്കെതിരെ അതിജീവിത കത്തിൽ ശക്തമായ ഭാഷയിൽ വിയോജിപ്പ് രേഖപ്പെടുത്തിയിട്ടുണ്ട്. കടുത്ത മാനസിക ആഘാതത്തിൽ നിന്നും പുറത്തുകടക്കാൻ ശ്രമിക്കുന്ന തന്നെ ദീപ ജോസഫ് എന്ന വ്യക്തി മാധ്യമങ്ങളിലൂടെയും സമൂഹമാധ്യമങ്ങളിലൂടെയും നിരന്തരം വേട്ടയാടുകയാണ്. അപകീർത്തികരമായ പരാമർശങ്ങൾ നടത്തിയതിന് തിരുവനന്തപുരം പോലീസ് ഇവർക്കെതിരെ കേസെടുത്തിട്ടുണ്ടെങ്കിലും ഇതുവരെ അറസ്റ്റ് ചെയ്യാൻ തയ്യാറായിട്ടില്ല. കീഴ്കോടതികളിൽ നിന്ന് ദീപ ജോസഫ് മുൻകൂർ ജാമ്യമോ സാധാരണ ജാമ്യമോ നേടിയിട്ടില്ലെന്നിരിക്കെ പോലീസ് കാണിക്കുന്ന നിഷ്ക്രിയത്വം ഒത്തുകളിയുടെ ഭാഗമാണെന്ന് കത്തിൽ സംശയം പ്രകടിപ്പിക്കുന്നു.
ദീപ ജോസഫ് കഴിഞ്ഞ ദിവസം ഡൽഹിയിൽ വെച്ച് മാധ്യമങ്ങളോട് നടത്തിയ അതിരുകടന്ന പരാമർശങ്ങളും നിലവിലെ പോലീസ് അന്വേഷണ പരിധിയിൽ ഉൾപ്പെടുത്തണമെന്ന് അതിജീവിത മുഖ്യമന്ത്രിക്കുള്ള കത്തിൽ ആവശ്യപ്പെട്ടു. കേസിൽ ഉന്നത രാഷ്ട്രീയ സ്വാധീനമുള്ളവർ ഉൾപ്പെട്ടിട്ടുള്ളതിനാൽ ഇരയ്ക്ക് നീതി ഉറപ്പാക്കാൻ ആഭ്യന്തര മന്ത്രാലയം നേരിട്ട് ഇടപെടണമെന്നാണ് അതിജീവിതയുടെ ആവശ്യം. കത്ത് ലഭിച്ച സാഹചര്യത്തിൽ ആഭ്യന്തര വകുപ്പ് പോലീസിനോട് അടിയന്തര റിപ്പോർട്ട് തേടുമെന്നാണ് സൂചന.
