ഹൈക്കോടതി വിധി സർക്കാരിന് തിരിച്ചടിയല്ല… വിധി പഠിച്ചശേഷം തീരുമാനമെന്ന്…

കൊച്ചി: സിഎംആർഎൽ–എക്സാലോജിക് സാമ്പത്തിക ഇടപാടുമായി ബന്ധപ്പെട്ട കേസിൽ പിണറായി വിജയനും പി.എ. മുഹമ്മദ് റിയാസിനുമെതിരെ കേസെടുക്കാമെന്ന ഹൈക്കോടതി ഉത്തരവിൽ പ്രതികരിച്ച് ആഭ്യന്തര മന്ത്രി രമേശ് ചെന്നിത്തല. കോടതി വിധി സർക്കാരിന് തിരിച്ചടിയല്ലെന്നും ഉത്തരവ് വിശദമായി പഠിച്ചശേഷം തുടർനടപടികളിൽ തീരുമാനമെടുക്കുമെന്നും അദ്ദേഹം പറഞ്ഞു.

സുപ്രീംകോടതി വിധിയുടെ അടിസ്ഥാനത്തിലാണ് നിലവിൽ പ്രാഥമിക അന്വേഷണം നടത്തുന്നതെന്നും ചെന്നിത്തല മാധ്യമങ്ങളോട് വ്യക്തമാക്കി. ഇഡി നൽകിയ കത്തിന്റെ അടിസ്ഥാനത്തിൽ അഴിമതി നിരോധന നിയമപ്രകാരം എഫ്‌ഐആർ രജിസ്റ്റർ ചെയ്യുന്നതിനാണ് ഹൈക്കോടതിയുടെ നിർണായക ഉത്തരവ്. ഇഡി കത്തിൽ നേരിട്ട് കേസെടുക്കാതെ ക്രൈംബ്രാഞ്ചിന്റെ പ്രത്യേക അന്വേഷണ സംഘത്തെ നിയോഗിച്ച് പ്രാഥമിക അന്വേഷണം നടത്താനുള്ള സർക്കാർ തീരുമാനത്തെയാണ് ഹർജിക്കാരൻ ചോദ്യം ചെയ്തത്.

പ്രാഥമിക അന്വേഷണത്തിന് ശേഷം എഫ്‌ഐആർ രജിസ്റ്റർ ചെയ്യാമെന്ന സംസ്ഥാന സർക്കാരിന്റെ നിലപാടിനോട് കോടതി സ്വീകരിച്ച സമീപനമാണ് കേസിൽ നിർണായകമായത്. കോടതിയിൽ മുദ്രവച്ച കവറിൽ ഇഡി സമർപ്പിച്ച കണ്ടെത്തലുകളും പരിഗണനയിലെത്തി. ഹൈക്കോടതി ഉത്തരവിന്റെ അടിസ്ഥാനത്തിൽ സർക്കാർ സ്വീകരിക്കുന്ന തുടർനടപടികളിലേക്കാണ് ഇനി ശ്രദ്ധ. വിധി പരിശോധിച്ചശേഷം മാത്രമേ ഇക്കാര്യത്തിൽ അന്തിമ തീരുമാനമുണ്ടാകൂവെന്നാണ് ചെന്നിത്തലയുടെ പ്രതികരണം.