തനിക്ക് സ്റ്റേജ് 3 ക്യാൻസർ; ഉടൻ ചികിത്സ ആരംഭിക്കും; ആദ്യമായി രോഗവിവരം തുറന്നുപറഞ്ഞ് രേണു സുധി

ബിഗ് ബോസ് മുൻതാരവും സോഷ്യൽ മീഡിയ ഇൻഫ്ലുവൻസറുമായ രേണു സുധി തനിക്ക് ക്യാൻസർ ബാധിച്ച വിവരം ഔദ്യോഗികമായി വെളിപ്പെടുത്തി. രോഗം ഇപ്പോൾ മൂന്നാം ഘട്ടത്തിലാണെന്നും (സ്റ്റേജ് 3) ഉടൻ തന്നെ കീമോതെറാപ്പി ചികിത്സ ആരംഭിക്കുമെന്നും ഒരു യൂട്യൂബ് ചാനലിന് നൽകിയ അഭിമുഖത്തിൽ രേണു വ്യക്തമാക്കി. കഴിഞ്ഞ കുറച്ചു ദിവസങ്ങളായി രേണു സുധിയുടെ ആരോഗ്യനിലയെക്കുറിച്ച് സോഷ്യൽ മീഡിയയിൽ പ്രചാരണങ്ങൾ നടന്നിരുന്നു. തുടക്കത്തിൽ ഇത് നിഷേധിച്ചിരുന്നെങ്കിലും, രോഗവിവരം സത്യമാണെന്ന് വ്യക്തമാക്കി കേരള ഹോം ഡിസൈൻ ഗ്രൂപ്പ് സ്ഥാപകൻ ഫിറോസ് കഴിഞ്ഞ ദിവസം രംഗത്തെത്തിയിരുന്നു. ഇതിന് പിന്നാലെയാണ് രേണു തന്നെ നേരിട്ട് രോഗവിവരം തുറന്നുപറഞ്ഞത്.

15-ാം വയസ്സിൽ ആദ്യ ലക്ഷണം; ഭയം കാരണം മാറ്റിവെച്ചു
തന്റെ 15-ാം വയസ്സിലാണ് മാറിടത്തിൽ ആദ്യമായി ഒരു മുഴ ശ്രദ്ധയിൽപ്പെട്ടതെന്ന് രേണു സുധി പറയുന്നു. അന്ന് അപ്പൻഡിസൈറ്റിസ് ഓപ്പറേഷൻ കഴിഞ്ഞ വേദനയിലായിരുന്നതിനാൽ പേടി കാരണം ഈ വിവരം വീട്ടിൽ പറഞ്ഞില്ല. പിന്നീട് ഡിപ്ലോമയ്ക്ക് പഠിക്കുന്ന കാലത്താണ് വീട്ടുകാർ ഇതറിയുന്നതും കോട്ടയം മെഡിക്കൽ കോളേജിൽ എത്തിച്ച് ബയോപ്സി ചെയ്യുന്നതും. ഭാവിയിൽ ഇത് ക്യാൻസർ ആകാൻ സാധ്യതയുണ്ടെന്ന് അന്ന് ഡോക്ടർമാർ മുന്നറിയിപ്പ് നൽകിയിരുന്നതായും രേണു ഓർക്കുന്നു.

സുധിയുടെ വേർപാടിന് ശേഷം രോഗസ്ഥിരീകരണം
നടനും ഭർത്താവുമായ സുധിയുടെ മരണശേഷമാണ് വീണ്ടും ഡോക്ടറെ കാണുന്നതും സ്കാനിംഗിനും മാമ്മോഗ്രാമിനും വിധേയയാകുന്നതും. തുടർന്ന് നടത്തിയ ബയോപ്സിയിലാണ് ക്യാൻസർ സ്ഥിരീകരിച്ചത്.

“റിപ്പോർട്ട് ഒറ്റയ്ക്കാണ് പോയി വാങ്ങിയത്. ക്യാൻസർ ആണെന്ന് അറിഞ്ഞപ്പോൾ ഒന്നും മിണ്ടിയില്ല. രണ്ടു മൂന്ന് ദിവസം ആരോടും പറയാതെ ആ റിപ്പോർട്ട് വീട്ടിൽ സൂക്ഷിച്ചുവെച്ചു.”
— രേണു സുധി

പിന്നീട് മാനേജർ കരിഷ്മ വഴിയാണ് വീട്ടുകാരും സുഹൃത്തുക്കളും വിവരമറിയുന്നത്. സ്വകാര്യ ആശുപത്രിയിലും മെഡിക്കൽ കോളേജിലും നടത്തിയ പരിശോധനകളിൽ രോഗം മൂന്നാം ഘട്ടത്തിലാണെന്ന് ഡോക്ടർമാർ സ്ഥിരീകരിക്കുകയായിരുന്നു.

മുന്നോട്ട് ജീവിക്കണം എന്ന ഒറ്റ ചിന്ത മാത്രമാണ് ഇപ്പോൾ തന്നെ നയിക്കുന്നതെന്ന് രേണു സുധി പറയുന്നു. അതോടൊപ്പം പെൺകുട്ടികൾക്കായി ഒരു പ്രധാന സന്ദേശവും താരം പങ്കുവെക്കുന്നുണ്ട്:

ശരീരത്തിൽ വേദനയില്ലാത്ത മുഴകൾ കണ്ടാൽ അത് നിസ്സാരമായി കാണരുത്.

വേദനയില്ലല്ലോ എന്ന് കരുതി ഡോക്ടറെ കാണാൻ മടിക്കരുത്.

കൃത്യമായ സമയത്ത് പരിശോധനകൾ നടത്തി സുരക്ഷിതരാകുക.