RBIയുടെ പലിശനിരക്ക് വർധന… ഭവന-വാഹന വായ്പകൾക്ക്…
വായ്പയെടുത്തവർക്ക് തിരിച്ചടിയായി റിസർവ് ബാങ്കിന്റെ പലിശനിരക്ക് വർധന. റിപ്പോ നിരക്ക് 5.5 ശതമാനമായി ഉയർത്തി. ഇതോടെ ഭവന, വാഹന വായ്പകൾ ഉൾപ്പെടെയുള്ള വായ്പകളുടെ പലിശനിരക്കിൽ വർധനയുണ്ടാകാൻ സാധ്യതയുണ്ട്. പണനയ കമ്മിറ്റി യോഗത്തിലെ തീരുമാനം റിസർവ് ബാങ്ക് ഗവർണർ സഞ്ജയ് മൽഹോത്ര പ്രഖ്യാപിച്ചു. നിലവിൽ 5.25 ശതമാനമായിരുന്ന റിപ്പോ നിരക്കാണ് 5.5 ശതമാനമാക്കി ഉയർത്തിയത്.
2023 ഫെബ്രുവരിയിലാണ് ആർബിഐ അവസാനമായി റിപ്പോ നിരക്ക് വർധിപ്പിച്ചത്. അന്ന് 25 ബേസിസ് പോയിന്റ് ഉയർത്തി നിരക്ക് 6.5 ശതമാനമാക്കിയിരുന്നു. തുടർന്ന് 2023-24 കാലയളവിൽ നിരക്കിൽ മാറ്റമുണ്ടായിരുന്നില്ല. 2025ൽ നിരക്ക് കുറയ്ക്കുന്ന ഘട്ടം ആരംഭിച്ചതിന് ശേഷമാണ് നിലവിലെ നിരക്ക് 5.25 ശതമാനത്തിലെത്തിയത്. ആഗോളതലത്തിൽ പണപ്പെരുപ്പം ഉയരാൻ സാധ്യതയുണ്ടെന്ന് ഗവർണർ സഞ്ജയ് മൽഹോത്ര പറഞ്ഞു. വ്യാപാരരംഗത്തെ അനിശ്ചിതത്വം തുടരുകയാണ്. ആഗോള വിപണികളിലും പൊതുവിൽ ദുർബലമായ പ്രവണതകളാണ് നിലനിൽക്കുന്നതെന്ന് അദ്ദേഹം വ്യക്തമാക്കി.
ഇറാൻ യുദ്ധത്തിന്റെ ആഘാതം ആഗോള വ്യാപാരത്തെയും വിതരണ ശൃംഖലകളെയും ബാധിച്ചിട്ടുണ്ടെന്നും മൽഹോത്ര പറഞ്ഞു. ആഗോള സാഹചര്യങ്ങൾ ഉൾപ്പെടെ വിവിധ ഘടകങ്ങൾ വിലയിരുത്തിയ ശേഷമാണ് പലിശനിരക്ക് സംബന്ധിച്ച തീരുമാനത്തിലേക്ക് എത്തിയതെന്നും ആർബിഐ ഗവർണർ വ്യക്തമാക്കി. റിപ്പോ നിരക്ക് ഉയരുന്നതോടെ ബാങ്കുകളുടെ വായ്പാ പലിശയിലും മാറ്റമുണ്ടാകാനുള്ള സാധ്യതയുണ്ട്. പ്രത്യേകിച്ച് ഫ്ലോട്ടിംഗ് റേറ്റ് ഭവന, വാഹന വായ്പകളുടെ EMIയിൽ വർധനയുണ്ടാകുമോ എന്നതിൽ വായ്പയെടുത്തവർക്ക് ആശങ്കയുണ്ട്.
