എക്സാലോജിക് മാത്രമല്ല, സിഎംആർഎല്ലിന്റെ മുഴുവൻ ഇടപാടുകളും ഇ.ഡി വലയിൽ…. പി.വി, ഒ.സി, ആർ.സി അടക്കമുള്ള ഡയറി പേരുകളിലേക്ക് അന്വേഷണം
തിരുവനന്തപുരം: പിണറായി വിജയന്റെ മകൾ വീണ വിജയന്റെ കമ്പനിയായ എക്സാലോജിക്കുമായി ബന്ധപ്പെട്ട കള്ളപ്പണ ഇടപാടുകൾക്ക് പുറമേ, കൊച്ചിൻ മിനറൽസ് ആൻഡ് റൂട്ടൈൽ ലിമിറ്റഡ് കമ്പനി നടത്തിയ മുഴുവൻ സാമ്പത്തിക ഇടപാടുകളും തങ്ങളുടെ അന്വേഷണ പരിധിയിലാണെന്ന് എൻഫോഴ്സ്മെന്റ് ഡയറക്ട്രേറ്റ് വ്യക്തമാക്കുന്നു. വീണ വിജയന്റെ കമ്പനിയുമായി നടത്തിയ ഇടപാടുകൾ മാത്രമല്ല, സി.എം.ആർ.എല്ലുമായി മറ്റു പ്രമുഖ രാഷ്ട്രീയ നേതാക്കളും ഉന്നതരും നടത്തിയ എല്ലാവിധ സാമ്പത്തിക കൈമാറ്റങ്ങളും വിശദമായി പരിശോധിക്കാനാണ് ഇ.ഡിയുടെ തീരുമാനം.
സി.എം.ആർ.എൽ സി.എഫ്.ഒ കെ.സി. സുരേഷ് കുമാറിന്റെ വസതിയിൽ മുൻപ് ആദായനികുതി വകുപ്പ് നടത്തിയ പരിശോധനയിൽ കണ്ടെത്തിയ ഡയറിയിലെ പേരുകൾ കേന്ദ്രീകരിച്ചായിരിക്കും ഇനിയുള്ള നീക്കങ്ങൾ. വിവാദ ഡയറിയിൽ ചുരുക്കപ്പേരിൽ രേഖപ്പെടുത്തിയിരുന്ന പ്രമുഖ യു.ഡി.എഫ്, എൽ.ഡി.എഫ് നേതാക്കളുടെ പേരുകളിലേക്ക് അന്വേഷണം നീളുന്നത് കേരള രാഷ്ട്രീയത്തെ ഉലയ്ക്കും. പി.വി (പിണറായി വിജയൻ), ഒ.സി (ഉമ്മൻചാണ്ടി), ആർ.സി (രമേശ് ചെന്നിത്തല), കെ.കെ (കുഞ്ഞാലിക്കുട്ടി), ഐ.കെ (ഇബ്രാഹിം കുഞ്ഞ്) എന്നീ പ്രമുഖരുടെ പേരുകളായിരുന്നു സി.എം.ആർ.എൽ ഡയറിയിൽ ഉണ്ടായിരുന്നത്. ഈ പേരുകളിലേക്ക് കൃത്യമായ സാമ്പത്തിക സ്രോതസ്സ് എത്തിയിട്ടുണ്ടോ എന്നാണ് ഇ.ഡി പരിശോധിക്കുന്നത്.
സി.എം.ആർ.എൽ – എക്സാലോജിക് കേസിന്റെ ഭാഗമായി ഇന്ന് പ്രതിപക്ഷ നേതാവ് പിണറായി വിജയന്റെ വീട്ടിലടക്കം കേരളത്തിലുടനീളം ഇ.ഡി വൻ റെയ്ഡാണ് നടത്തുന്നത്. എന്നാൽ, ഈ മിന്നൽ പരിശോധനകളെക്കുറിച്ച് സംസ്ഥാന ആഭ്യന്തര വകുപ്പിന് യാതൊരു മുൻകൂർ വിവരവും ലഭിച്ചിട്ടില്ലെന്ന് ആഭ്യന്തര മന്ത്രി രമേശ് ചെന്നിത്തല വ്യക്തമാക്കി. റെയ്ഡിനെക്കുറിച്ച് ഡി.ജി.പിയോട് സംസാരിച്ചുവെന്നും പോലീസിനും ഇതേക്കുറിച്ച് ഔദ്യോഗിക വിവരമൊന്നുമില്ലെന്നാണ് ലഭിച്ച മറുപടിയെന്നും ചെന്നിത്തല തിരുവനന്തപുരത്ത് പറഞ്ഞു. സംസ്ഥാനത്ത് പരസ്യമായ രാഷ്ട്രീയ യുദ്ധത്തിന് വഴിമരുന്നിട്ടുകൊണ്ട് ഇ.ഡി റെയ്ഡ് ശക്തമാക്കുമ്പോൾ, വരും ദിവസങ്ങളിൽ സി.എം.ആർ.എൽ ഉദ്യോഗസ്ഥരെയും ഡയറിയിൽ പേരുള്ള നേതാക്കളെയും കൊച്ചിയിലെ ഇ.ഡി ഓഫീസിലേക്ക് ചോദ്യം ചെയ്യാനായി വിളിപ്പിച്ചേക്കും.
