പരിക്കേൽക്കാത്ത മൃതദേഹം റെയിൽവേ ട്രാക്കിൽ കണ്ട് പൊലീസിന് തോന്നിയ സംശയം.. തെളിഞ്ഞത്..

കൊച്ചി പുതുക്കലവട്ടത്ത് റെയിൽവെ ട്രാക്കിൽ കണ്ട മൃതദേഹം കൊലപാതകമാണെന്ന സ്ഥിരീകരണത്തിന് പിന്നാലെ അന്വേഷണത്തിൽ കണ്ടെത്തിയ കൂടുതൽ വിവരങ്ങൾ പൊലീസ് പുറത്തുവിട്ടു. ഒഡീഷ സ്വദേശിയായ 31 വയസ്സുള്ള അജിത നായിക് ആണ് കൊല്ലപ്പെട്ടത്. മരിച്ച് ട്രാക്കിൽ കിടന്നയാൾക്ക് ട്രെയിൻ തട്ടിയതിന്റേയോ ട്രെയിനിൽ നിന്ന് വീണതിന്റേയോ യാതൊരു പരിക്കും കാണാഞ്ഞതാണ് കൊലപാതകമെന്ന സംശയം ജനിപ്പിച്ചത്. കേസിൽ പ്രതികളായ അജിത നായികിൻ്റെ ഭാര്യ റീനയെയും മകളെയും പൊലീസ് അറസ്റ്റ് ചെയ്തു. മകളുടെ സഹായത്തോടെ റീനയാണ് ഭർത്താവായ അജിത നായികിനെ കൊലപ്പെടുത്തിയതെന്ന് പൊലീസ് പറയുന്നു.

എറണാകുളം ഇടപ്പിള്ളി റെയിൽവേ ലൈനിൽ പുതുക്കലവട്ടം ഭാഗത്ത് റെയിൽവേ ട്രാക്കിംഗ് സമീപത്താണ് കൊല്ലപ്പെട്ട അജിത നായിക് കുടുംബത്തോടൊപ്പം വാടകയ്ക്ക് താമസിച്ചത്. ഇവർ ഒഡീഷ സ്വദേശികളാണ്. അജിത നായിക്കും ഭാര്യയും ഭാര്യയുടെ ആദ്യ ബന്ധത്തിലുള്ള രണ്ട് പെൺകുട്ടികളും ഒന്നിച്ചായിരുന്നു പുതുക്കലവട്ടത്തെ വീട്ടിൽ വാടകയ്ക്ക് താമസിച്ചിരുന്നത്. കൊലചെയ്യപ്പെട്ട അജിത നായിക് സ്ഥിരമായി മദ്യപിച്ച് വന്ന് ഭാര്യയും കുട്ടികളെയും ശാരീരികമായി ഉപദ്രവിക്കുമായിരുന്നു.

ഇന്നലെ രാത്രി അമിതമായി മദ്യപിച്ച് എത്തി അജിത നായിക് ഭാര്യയെയും പ്രായപൂർത്തിയാകാത്ത ഇളയ കുട്ടിയെയും ഉപദ്രവിച്ചു. തുടർന്ന് ഭാര്യ റീന നായിക് ഇയാളെ ചവിട്ടിവീഴ്ത്തി. തുടർന്ന് മകളും ഇയാളെ കഴുത്തിലും നെഞ്ചിലും ചവിട്ടി. മരിച്ചെന്ന് ഉറപ്പായപ്പോൾ റീന ബെഡ്ഷീറ്റിൽ പൊതിഞ്ഞ മൃതദേഹം റെയിൽവെ ട്രാക്കിൽ ഉപേക്ഷിക്കുകയായിരുന്നു.