വിദ്യാർത്ഥി പ്രക്ഷോഭത്തിന് കരുത്ത് പകരാൻ അഭിഭാഷകരും….
നീറ്റ് പരീക്ഷാ വിവാദത്തിൽ കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാന്റെ രാജി ആവശ്യപ്പെട്ട് തലസ്ഥാനത്ത് നടക്കുന്ന വിദ്യാർത്ഥി പ്രക്ഷോഭത്തിന് പൂർണ്ണ ഐക്യദാർഢ്യവുമായി സുപ്രീം കോടതി അഭിഭാഷകർ. സുപ്രീം കോടതി പരിസരത്ത് ഒരുമിച്ചുകൂടിയ ഒരു വിഭാഗം അഭിഭാഷകർ ഇന്ത്യൻ ഭരണഘടനയുടെ ആമുഖം കൂട്ടമായി വായിച്ചാണ് പ്രതിഷേധത്തിൽ അണിചേർന്നത്. ഭരണഘടന ഉറപ്പുനൽകുന്ന അടിസ്ഥാന മൂല്യങ്ങളോടുള്ള പ്രതിബദ്ധത പ്രകടിപ്പിക്കാനും, രാജ്യത്ത് നടക്കുന്ന വിദ്യാർത്ഥി പ്രതിഷേധങ്ങൾക്ക് പിന്തുണ നൽകാനുമാണ് ഈ പ്രതീകാത്മക പ്രതിഷേധം സംഘടിപ്പിച്ചതെന്ന് പങ്കെടുത്ത അഭിഭാഷകർ വ്യക്തമാക്കി.
ഭരണഘടനയുടെ ആമുഖം ഒന്നിച്ചു വായിച്ച ശേഷം ജനാധിപത്യം, നീതി, സ്വാതന്ത്ര്യം, സമത്വം, സാഹോദര്യം തുടങ്ങിയ ഭരണഘടനാ മൂല്യങ്ങൾ സംരക്ഷിക്കേണ്ടത് ഓരോ പൗരന്റെയും ഉത്തരവാദിത്തമാണെന്ന് അഭിഭാഷകർ അഭിപ്രായപ്പെട്ടു. സമാധാനപരമായി അഭിപ്രായം പ്രകടിപ്പിക്കാനും പ്രതിഷേധിക്കാനുമുള്ള ഭരണഘടനാവകാശം സംരക്ഷിക്കപ്പെടേണ്ടത് അനിവാര്യമാണെന്നും ഇവർ ചൂണ്ടിക്കാട്ടി. മുതിർന്ന അഭിഭാഷക ഇന്ദിരാ ജെയ്സിംഗ്, ഡോ. എസ്. മുരളീധർ എന്നിവരുടെ നേതൃത്വത്തിലാണ് ആമുഖം ചൊല്ലിയത്. സുപ്രീം കോടതി ബാർ അസോസിയേഷൻ പ്രസിഡന്റും മുതിർന്ന അഭിഭാഷകനുമായ വികാസ് സിംഗ്, മുതിർന്ന അഭിഭാഷകരായ ആനന്ദ് ഗ്രോവർ, അഞ്ജന പ്രകാശ്, സഞ്ജയ് ഘോഷ്, ഷാദൻ ഫറാസത്ത്, അരുന്ധതി കട്ജു, മഹാലക്ഷ്മി പവാനി, നന്ദിത റാവു, പി.വി. സുരേന്ദ്രനാഥ്, മണാലി സിംഗാൾ, സംഗീത ഭാരതി, പി.വി. ദിനേഷ്, ജയന്ത് താക്കൂർ, വൃന്ദ ഗ്രോവർ തുടങ്ങി പ്രമുഖരായ നിരവധി അഭിഭാഷകർ ചടങ്ങിൽ പങ്കെടുത്തു.
ഭരണഘടനയുടെ ആത്മാവ് ഉയർത്തിപ്പിടിക്കുക എന്ന ലക്ഷ്യത്തോടെയാണ് ഈ പ്രതിഷേധമെന്നും, ഇത് ഏതെങ്കിലും രാഷ്ട്രീയ നിലപാടിന്റെ ഭാഗമല്ലെന്നും അഭിഭാഷകർ വ്യക്തമാക്കി. സുപ്രീം കോടതിക്ക് മുന്നിൽ സമാധാനപരമായി നടന്ന ഈ പ്രതിഷേധത്തിന്റെ ചിത്രങ്ങളും വീഡിയോകളും ഇതിനോടകം സമൂഹമാധ്യമങ്ങളിൽ വൻതോതിൽ പ്രചരിക്കുന്നുണ്ട്.
