സുഹൃത്തിനെ ആക്രമിച്ച കേസിൽ കോടതിയിൽ സാക്ഷി പറഞ്ഞു… യുവാവിനെ വെട്ടിക്കൊല്ലാൻ ശ്രമിച്ച് ഗുണ്ടാസംഘം

തിരുവനന്തപുരം: കഠിനംകുളത്ത് കോടതിയിൽ സാക്ഷി പറഞ്ഞതിന്റെ വൈരാഗ്യത്തിൽ യുവാവിനെ വെട്ടിക്കൊലപ്പെടുത്താൻ ശ്രമം. ചിറ്റാറ്റുമുക്ക് സ്വദേശിയായ ഫെബിൻ ആണ് രണ്ടംഗ സംഘത്തിന്റെ ക്രൂരമായ ആക്രമണത്തിനിരയായത്. കഴിഞ്ഞ ദിവസം രാത്രിയിലാണ് നാടിനെ നടുക്കിയ ഈ സംഭവം ഉണ്ടായത്. ആക്രമണത്തിൽ ഇരു കൈകൾക്കും ഗുരുതരമായി പരിക്കേറ്റ ഫെബിനെ നിലവിൽ സ്വകാര്യ ആശുപത്രിയിൽ പ്രവേശിപ്പിച്ചിരിക്കുകയാണ്.

കഴിഞ്ഞ വർഷം ഫെബിന്റെ സുഹൃത്തിനെ ഒരു ഏഴംഗ സംഘം ക്രൂരമായി ആക്രമിച്ചിരുന്നു. ഈ ആക്രമണക്കേസിലെ പ്രധാന ദൃക്സാക്ഷിയായിരുന്നു ഫെബിൻ. കേസ് കോടതിയിലെത്തിയപ്പോൾ പ്രതികൾക്കെതിരെ ഫെബിൻ കൃത്യമായ സാക്ഷിമൊഴി നൽകിയിരുന്നു. ഇതിലുള്ള കടുത്ത വൈരാഗ്യമാണ് ഫെബിന് നേരെയുള്ള വധശ്രമത്തിൽ കലാശിച്ചത്. ഫെബിന്റെ സുഹൃത്തിനെ ആക്രമിച്ച കേസിലെ പ്രതികളായ വിനോദ്, ക്ലിന്റൺ എന്നിവർ ചേർന്നാണ് കഴിഞ്ഞ ദിവസം രാത്രി ഫെബിനെ തടഞ്ഞുനിർത്തി വെട്ടിയത്. മാരകായുധങ്ങൾ ഉപയോഗിച്ചുള്ള ആക്രമണത്തിൽ ഫെബിന്റെ ഇരു കൈകൾക്കും ആഴത്തിൽ വെട്ടേറ്റു. നിലവിളി കേട്ട് ആളുകൾ ഓടിക്കൂടിയതോടെയാണ് പ്രതികൾ സംഭവസ്ഥലത്തുനിന്ന് രക്ഷപ്പെട്ടത്.

സംഭവത്തിൽ കഠിനംകുളം പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്. ഒളിവിൽ പോയ പ്രതികളായ വിനോദ്, ക്ലിന്റൺ എന്നിവർക്കായി പൊലീസ് തിരച്ചിൽ ഊർജിതമാക്കി. ദൃക്‌സാക്ഷികൾക്ക് നേരെ ഗുണ്ടാസംഘങ്ങൾ നടത്തുന്ന ഇത്തരം അക്രമങ്ങൾ പ്രദേശവാസികൾക്കിടയിൽ വലിയ ആശങ്കയ്ക്ക് കാരണമായിട്ടുണ്ട്.