സർക്കാരിന്റെ മുൻകൂർ അനുമതിയില്ലാതെ കരാറിലേർപ്പെടാൻ അദാനിക്ക് എങ്ങനെ ധൈര്യമുണ്ടായി?… യുഡിഎഫ് സർക്കാർ മറുപടി പറയണമെന്ന് പിണറായി

തിരുവനന്തപുരം: വിഴിഞ്ഞം തുറമുഖത്തിൽ എം.എസ്.സി. കമ്പനിയുമായി അദാനി ഗ്രൂപ്പ് ഉണ്ടാക്കിയ ഓഹരി കൈമാറ്റ കരാർ ചട്ടങ്ങളുടെ ലംഘനമാണെന്നും വിഷയത്തിൽ ഒട്ടേറെ ദുരൂഹതകളും സംശയങ്ങളും ഉയരുന്നുണ്ടെന്നും പ്രതിപക്ഷ നേതാവ് പിണറായി വിജയൻ. 25 ശതമാനത്തിൽ കൂടുതൽ ഓഹരി കൈമാറ്റം നടക്കുകയാണെങ്കിൽ സംസ്ഥാന സർക്കാരിനെ മുൻകൂറായി അറിയിക്കണമെന്നാണ് വ്യവസ്ഥയെന്നും ഇത് ലംഘിച്ച് കരാറിലേർപ്പെടാൻ അദാനി ഗ്രൂപ്പിന് എങ്ങനെ ധൈര്യമുണ്ടായെന്നും പ്രതിപക്ഷ നേതാവ് ചോദിച്ചു. വാർത്താസമ്മേളനത്തിൽ സംസാരിക്കുകയായിരുന്നു അദ്ദേഹം.

നാടിന്റെ പൊതുസമ്പത്ത് കുത്തകകൾക്ക് തീറെഴുതാനുള്ള നീക്കങ്ങളാണ് യുഡിഎഫ് സർക്കാർ തുടക്കംമുതലേ നടത്തുന്നത്. അദാനി-വിഴിഞ്ഞം പോർട്ടിൽ വിദേശ കുത്തക കമ്പനിയായ എംഎസ്‌സി നിക്ഷേപം നടത്തുന്നത് വലിയ വിദേശ നിക്ഷേപമാണെന്ന് വരുത്തി തീർക്കാൻ ചിലർ ശ്രമിക്കുന്നുണ്ട്. എന്നാൽ, അദാനി ഗ്രൂപ്പ് അവരുടെ ഓഹരി കൈമാറ്റത്തിലൂടെ ലാഭമുണ്ടാക്കാനുള്ള നീക്കമാണ് നടത്തിയത്. സംസ്ഥാന സർക്കാരിന്റെ മുൻകൂർ അംഗീകാരമില്ലാതെ നടത്തിയ ഈ ഓഹരി കൈമാറ്റം കരാർ ലംഘനമാണ്. ഇക്കാര്യത്തിൽ സംസ്ഥാന സർക്കാർ നിലപാട് വ്യക്തമാക്കണമെന്നും അദാനി ഗ്രൂപ്പിന്റെ നീക്കം സർക്കാരിന്റെ അറിവോടെയാണോയെന്ന് വെളിപ്പെടുത്തണമെന്നും പിണറായി ആവശ്യപ്പെട്ടു.

അദാനി പോർട്ട് സെബിക്ക് കൊടുത്ത അപേക്ഷയിൽ ജൂൺ 29ന് തന്നെ ഓഹരി ഇടപാട് ഒപ്പിട്ടു കഴിഞ്ഞുവെന്ന് പറയുന്നുണ്ട്. ഇത് കേരള താത്പര്യത്തിന് വിരുദ്ധമായ കാര്യമാണ്. വിഴിഞ്ഞം തുറമുഖം പുതിയ ഉടമയ്ക്ക് വിൽക്കുന്നതിന്റെ ആദ്യപടിയായി ഇതിനെ കാണാവുന്നതാണ്. ഷിപ്പിങ് കമ്പനിയായ എംഎസ്‌സി വിഴിഞ്ഞം തുറമുഖം നിയന്ത്രിക്കുന്ന സാഹചര്യമുണ്ടായാൽ അത് കുത്തകയായി മാറും. അങ്ങനെ വരുമ്പോൾ മറ്റു കമ്പനികളുടെ കപ്പലുകൾ ഇങ്ങോട്ടേക്ക് വരുന്നതിന് തടസ്സമുണ്ടാകുകയും നമുക്ക് ലഭിക്കേണ്ട വരുമാനത്തിൽ വലിയ മാറ്റമുണ്ടാകുകയും ചെയ്യും. അദാനി ഗ്രൂപ്പിന്റെ താത്പര്യത്തിന് സർക്കാർ വഴങ്ങി കൊടുക്കരുത്. എവിടെയോ എന്തോ അസാധാരണ കാര്യങ്ങൾ സംഭവിച്ചിട്ടുണ്ടെന്നും പ്രതിപക്ഷ നേതാവ് കൂട്ടിച്ചേർത്തു.

വീര്യംകുറഞ്ഞ മദ്യത്തിന് നികുതിയിളവ് നൽകിയ യുഡിഎഫ് സർക്കാർ നടപടിയെയും പിണറായി വിജയൻ കടുത്ത ഭാഷയിൽ വിമർശിച്ചു. കോർപ്പറേറ്റ് മുതലാളിമാരുടെ ലാഭക്കൊതിക്ക് കുടപിടിക്കുന്ന ഒരു സർക്കാരിന്റെ യഥാർത്ഥ മുഖമാണ് നിയമസഭയിൽ കണ്ടത്. എല്ലാ ചട്ടങ്ങളും പറത്തിക്കൊണ്ടാണ് ധനകാര്യ ബിൽ സഭയിൽ പാസാക്കിയത്. ബജറ്റ് അവതരണത്തിന് ശേഷം സഭാ സമ്മേളനത്തിന്റെ രണ്ടാംപാദത്തിൽ, മദ്യ കമ്പനികൾക്കുള്ള നികുതിയിളവിന് സാധൂകരണം നൽകാൻ വളരെ തിടുക്കപ്പെട്ട് ധനകാര്യ ബിൽ അജണ്ടയിൽ തിരുകി കയറ്റുകയായിരുന്നു. ചില മദ്യ കമ്പനികളെ സഹായിക്കുക എന്ന ഗൂഢ ലക്ഷ്യത്തോടെ ഒരു തരത്തിലുള്ള ഒളിച്ചുകടത്തലാണ് സർക്കാർ നടത്തിയത്. ഇത്തരമൊരു ബിൽ പാസാക്കാൻ മുഖ്യമന്ത്രി വലിയ കടുംപിടുത്തം കാണിച്ചു.

യുഡിഎഫിൽ ചർച്ച ചെയ്തതിന് ശേഷമേ ഇത് നടപ്പാക്കൂ എന്ന് മുഖ്യമന്ത്രി പരസ്യമായി നൽകിയ ഉറപ്പ് പാലിക്കപ്പെട്ടില്ല. ബെവ്‌കോയോ സർക്കാരോ വീര്യം കുറഞ്ഞ മദ്യം വിൽക്കാൻ തീരുമാനിച്ചിട്ടുണ്ടോ എന്ന കാര്യത്തിൽ സർക്കാർ ഉരുണ്ട് കളിക്കുകയാണ്. ബെക്കാർഡിക്ക് നിയമവിരുദ്ധമായി നികുതിയിളവ് നൽകാൻ മുഖ്യമന്ത്രി തന്നെ മുൻകൈ എടുക്കുന്നു എന്നതാണ് വ്യക്തമാകുന്നത്. നികുതിയിളവ് നൽകുന്നതിലൂടെ സമൂഹത്തിനും സർക്കാരിനും നഷ്ടം മാത്രമാണുള്ളത്. മദ്യത്തിന് ഒരു നികുതിയിളവും എൽഡിഎഫ് സർക്കാർ നൽകിയിട്ടില്ല. എന്നാൽ പഴം, ധാന്യം എന്നിവയിൽനിന്ന് ഉത്പാദിപ്പിക്കുന്ന ഹോർട്ടിവൈന് നികുതിയിളവ് നൽകുന്ന കാര്യം എൽഡിഎഫ് ആലോചിച്ചിരുന്നുവെന്നും പിണറായി വിജയൻ വാർത്താസമ്മേളനത്തിൽ വ്യക്തമാക്കി. സംസ്ഥാന താത്പര്യത്തിന് അനുകൂലമായി സർക്കാർ എടുക്കുന്ന എല്ലാ നിലപാടുകളെയും പ്രതിപക്ഷം പിന്തുണയ്ക്കുമെന്നും എന്നാൽ സംസ്ഥാന താത്പര്യത്തിന് വിരുദ്ധമായി എന്തെങ്കിലും വന്നാൽ ശക്തമായി എതിർക്കുമെന്നും അദ്ദേഹം കൂട്ടിച്ചേർത്തു.