റെയ്ഡിൽ ഒന്നും കിട്ടിയില്ല, സുഹൃത്തിനെ ഭീഷണിപ്പെടുത്തി… ഇഡിക്കെതിരെ….
കോഴിക്കോട്: CMRL–Exalogic ഇടപാടുമായി ബന്ധപ്പെട്ട എൻഫോഴ്സ്മെന്റ് ഡയറക്ടറേറ്റിന്റെ വാദങ്ങൾ തള്ളി പി.എ. മുഹമ്മദ് റിയാസ്. വീണ ടി. നിയമപരമായാണ് പണം സ്വീകരിച്ചതെന്നും Exalogic പണം കൈപ്പറ്റിയത് സേവനം നൽകിയതിനാണെന്നും റിയാസ് പറഞ്ഞു. വീണ സേവനം നൽകിയിട്ടില്ലെന്ന് CMRL എംഡി മൊഴി നൽകിയിട്ടില്ലെന്നും പ്രതികരിക്കാതിരിക്കാനുള്ള അവകാശം വീണയ്ക്കുണ്ടെന്നും മുഹമ്മദ് റിയാസ് വ്യക്തമാക്കി.
റെയ്ഡ് നടത്തിയിട്ടും ഒന്നും കണ്ടെത്താനാകാതെ വന്നതോടെയാണ് തന്റെ സുഹൃത്തിനെ ഇഡി ഭീഷണിപ്പെടുത്തിയതെന്നാണ് റിയാസിന്റെ ആരോപണം. പിണറായി വിജയന്റെ ഇടപാടാണെന്ന് പറയാൻ ഇഡി ആവശ്യപ്പെട്ടെന്നും എന്നാൽ പിണറായി വിജയനെ കണ്ടിട്ടുപോലുമില്ലെന്ന് സുഹൃത്ത് മറുപടി നൽകിയെന്നും അദ്ദേഹം പറഞ്ഞു. മകളെ പ്രതിയാക്കണോ എന്ന് ചോദിച്ചാണ് സുഹൃത്തിനെ ഭീഷണിപ്പെടുത്തിയതെന്നും റിയാസ് ആരോപിച്ചു. മെയ് 27ലെ റെയ്ഡുമായി ബന്ധപ്പെട്ട് പല കഥകളും പുറത്തുവന്നെങ്കിലും സുഹൃത്തിന്റെ വീട്ടിൽ ഗൗരവമേറിയ കാര്യങ്ങളാണ് നടന്നതെന്നും അദ്ദേഹം പറഞ്ഞു. എല്ലാവർക്കും ഇഡിയെ പേടിയാണെങ്കിലും കമ്മ്യൂണിസ്റ്റുകാർ ഇഡിയെ പേടിക്കേണ്ടതില്ലെന്ന് മുഹമ്മദ് റിയാസ് പറഞ്ഞു. ഒരിക്കൽ സത്യം ജയിക്കും. ബിജെപിക്കെതിരായ പോരാട്ടം തുടരുമെന്നും എത്ര വേട്ടയാടിയാലും പിന്നോട്ടില്ലെന്നും അദ്ദേഹം വ്യക്തമാക്കി.
മുഖ്യമന്ത്രി ഇന്നലെ വിഷയത്തെ ഗൗരവമുള്ള പ്രശ്നമെന്ന് വിശേഷിപ്പിച്ചിരുന്നു. എന്നാൽ രാഹുൽ ഗാന്ധിക്കെതിരെ ഉണ്ടാക്കിയ മൊഴിയും ഇതേ ഗൗരവത്തോടെ കാണേണ്ടതാണോയെന്ന് കോൺഗ്രസ് വ്യക്തമാക്കണമെന്നും റിയാസ് ആവശ്യപ്പെട്ടു. വീണ നൽകാത്ത മൊഴി നൽകിയെന്ന് പറയുന്നത് ഗുരുതരമായ വിഷയമാണെന്നും റിയാസ് പറഞ്ഞു. ചുവന്ന ഡയറി ഉണ്ടെന്ന് ഇഡി പറയുന്നുണ്ടെങ്കിൽ അന്വേഷിക്കട്ടെയെന്നും അദ്ദേഹം വെല്ലുവിളിച്ചു. റെയ്ഡിൽ എന്താണ് കണ്ടെത്തിയതെന്നും കേസുമായി ബന്ധപ്പെട്ട് എന്തെങ്കിലും പണം കണ്ടെത്തിയിട്ടുണ്ടോയെന്നും മുഹമ്മദ് റിയാസ് ചോദിച്ചു. തന്റെ ഭാര്യയെ വേട്ടയാടുകയാണെന്നും അദ്ദേഹം ആരോപിച്ചു. ഇഡിയുടെ ഇത്തരം നിലപാട് പുതുമയുള്ളതല്ലെന്നും എല്ലാ കാര്യങ്ങളും നിയമപരമായി നേരിടുമെന്നും പതറിപ്പോകുന്ന പ്രശ്നമില്ലെന്നും മുഹമ്മദ് റിയാസ് വ്യക്തമാക്കി.
