ഓർഡർ ചെയ്യാതെയെത്തിയ പാർസൽ പണം കൊടുത്ത് വാങ്ങി തുറന്നപ്പോൾ..
ഓൺലൈനായി വാങ്ങിയിട്ടില്ലെന്ന് ഉറപ്പുണ്ടെങ്കിൽ ഓൺലൈനായി ലഭിക്കുന്ന പാർസലുകൾ തുറക്കരുതെന്നതും പ്രത്യേകിച്ചും പണം അടച്ച് അവ കൈപ്പറ്റരുതെന്നുമുള്ള ഒരു അനുഭവം പങ്കുവയ്ക്കപ്പെട്ടപ്പോൾ സമൂഹ മാധ്യമങ്ങളിൽ അത് വൈറലായി. ഓർഡർ ചെയ്യാത്ത ഒരു ക്യാഷ് ഓൺ ഡെലിവറി പാർസൽ വീട്ടിലെത്തിയെന്നും അതിനുള്ളിൽ ഉണ്ടായിരുന്നത് കീറിപ്പറിഞ്ഞ ഉപയോഗിച്ച് ഉപേക്ഷിച്ച ഒരു കുർത്തയാണെന്നും യുവതിയുടെ പരാതി. എഴുത്തുകാരിയും സോഷ്യൽ മീഡിയ ഉപയോക്താവുമായ കിരൺ മൻറാളാണ് സംഭവത്തെക്കുറിച്ച് എക്സിൽ പങ്കുവെച്ചത്. ഡെലിവറി വഴിയെത്തിയ പാർസലിൽ തൻറെ പേര്, ഫോൺ നമ്പർ, വിലാസം എന്നിവ കൃത്യമായിരുന്നെങ്കിലും അയച്ചയാളുടെ വ്യക്തമായ വിവരങ്ങളൊന്നും ഉണ്ടായിരുന്നില്ലെന്നും കിരൺ കുറിപ്പിൽ പറയുന്നു.
പാർസൽ ക്യാഷ് ഓൺ ഡെലിവറി ആയിരുന്നതിനാൽ മകൻ പണം നൽകിയ ശേഷമാണ് പാക്കറ്റ് തുറന്നതെന്നും കിരൺ പറഞ്ഞു. എന്നാൽ, താൻ ഇത്തരമൊരു സാധനവും ഓർഡർ ചെയ്തിരുന്നില്ല. പാക്കറ്റ് തുറന്നപ്പോൾ പകുതി കീറിയ നിലയിലുള്ള പഴയ, ഉപയോഗിച്ച ഒരു കുർത്തയാണ് ലഭിച്ചതെന്നും അവർ വ്യക്തമാക്കി. സംഭവത്തെ ‘വിപുലമായി ആസൂത്രണം ചെയ്ത തട്ടിപ്പ്’ എന്നാണ് കിരൺ വിശേഷിപ്പിച്ചത്.
പണം നൽകിയ ശേഷം ആരാണ് പാർസൽ അയച്ചതെന്ന് കണ്ടെത്താൻ കഴിയാത്ത അവസ്ഥയാണെന്നും, ഇതുപോലെ എത്ര പേർ തട്ടിപ്പിനിരയായിട്ടുണ്ടാകാമെന്ന ആശങ്കയുണ്ടെന്നും അവർ ചൂണ്ടിക്കാട്ടി. തുക ചെറുതാണെങ്കിലും വിഷയം പണത്തിൻറെ മാത്രം കാര്യമല്ലെന്നും കിരൺ വ്യക്തമാക്കുന്നു.
