കനാലുകളിലെ കോഴിമാലിന്യം…. ആലപ്പുഴയെ വിഴുങ്ങാൻ പെരുമ്പാമ്പുകൾ പെരുകുന്നു…. വനംവകുപ്പിന്റെ മുന്നറിയിപ്പ്

ആലപ്പുഴ: ആലപ്പുഴ നഗരത്തിലും പരിസരപ്രദേശങ്ങളിലും പെരുമ്പാമ്പുകളുടെ എണ്ണം അസാധാരണമാംവിധം വർദ്ധിക്കുന്നത് ജനങ്ങളെ കടുത്ത ഭീതിയിലാഴ്ത്തുന്നു. നഗരമധ്യത്തിലെ കനാലുകളിൽ വ്യാപകമായി ഇറച്ചിമാലിന്യങ്ങൾ തള്ളുന്നതാണ് പെരുമ്പാമ്പുകൾ പെറ്റുപെരുകാൻ പ്രധാന കാരണമെന്ന് വനംവകുപ്പ് ഔദ്യോഗികമായി സ്ഥിരീകരിച്ചു. ഏറ്റവും ഒടുവിലായി, കോടതിപ്പാലത്തിന് സമീപമുള്ള അമ്പലപ്പുഴ താലൂക്ക് ചെത്തുതൊഴിലാളി യൂണിയൻ ഓഫീസിന്റെ പരിസരത്തുനിന്നും ബുധനാഴ്ച രാവിലെ ഒരു വലിയ പെരുമ്പാമ്പിനെ പിടികൂടി. പകൽ 10.30 ഓടെ വനംവകുപ്പിന്റെ സർപ്പ പ്രതിനിധിയായ ജിബിൻ എത്തിയാണ് പാമ്പിനെ സുരക്ഷിതമായി മാറ്റിയത്. ഓഫീസിന് മുന്നിലെ വലയിൽ തല കുടുങ്ങിയ നിലയിലായിരുന്നു ഈ പാമ്പ്. തൊട്ടുമുമ്പത്തെ ദിവസമായ ചൊവ്വാഴ്ചയും ഇതേ സ്ഥലത്തുനിന്ന് മറ്റൊരു പെരുമ്പാമ്പിനെ പിടികൂടിയിരുന്നു.

ആലപ്പുഴ നഗരത്തിൽ ചരിത്രത്തിൽ ഇത്രയധികം പെരുമ്പാമ്പുകൾ ഒരേസമയം പെരുകുന്നത് ഇതാദ്യമായാണെന്ന് അധികൃതരും നാട്ടുകാരും ചൂണ്ടിക്കാട്ടുന്നു. നഗരത്തിലെ അറവുശാലകളിൽ നിന്നുള്ള അവശിഷ്ടങ്ങളും, കോഴി-ഇറച്ചി മാലിന്യങ്ങളും, ഇവ വൃത്തിയാക്കുന്ന ചോരവെള്ളവും പലരും കനാലുകളിലേക്കാണ് നേരിട്ട് ഒഴുക്കുന്നത്. പാമ്പുകൾക്ക് ആവശ്യമായ ആഹാരം ഇവിടെ യഥേഷ്ടം ലഭിക്കുന്നതിനാൽ ഇവ നഗരമധ്യത്തിൽ തന്നെ താവളമാക്കുകയാണ്. മറ്റു പാമ്പുകൾ ഒരു സമയം 10 മുതൽ 15 വരെ മുട്ടകൾ ഇടുമ്പോൾ, പെരുമ്പാമ്പുകൾ ഒരൊറ്റ തവണ 40-ൽ പരം മുട്ടകളാണ് വിരിയിക്കുന്നത്. നിലവിൽ ഇരുമ്പുപാലം, ശവക്കോട്ടപ്പാലം, എ.എസ് കനാൽ തുടങ്ങിയ കനാലുകളിലും ഇവയ്ക്ക് സമീപമുള്ള കാടുമൂടിയ ഇടങ്ങളിലും കുഞ്ഞുങ്ങൾ ഉൾപ്പെടെ ഒട്ടേറെ പാമ്പുകൾ താവളമടിച്ചിട്ടുണ്ട്. ഇവ രാത്രികാലങ്ങളിൽ കൂട്ടത്തോടെ റോഡുകളിലേക്ക് ഇഴഞ്ഞെത്തുന്നത് കാൽനടയാത്രക്കാർക്കും വാഹനയാത്രക്കാർക്കും വലിയ ഭീഷണിയാണ്.

പെരുമ്പാമ്പുകൾക്ക് വിഷമില്ലെങ്കിലും ഇവയുടെ കടിയേറ്റാൽ ഉണ്ടാകുന്ന ആഘാതം വളരെ കൂടുതലായിരിക്കുമെന്ന് വനംവകുപ്പ് ഉദ്യോഗസ്ഥർ മുന്നറിയിപ്പ് നൽകുന്നു. കടിയേൽക്കുന്ന ഭാഗത്തെ രക്തക്കുഴലുകൾ മുറിയാനും വലിയ തോതിൽ രക്തസ്രാവമുണ്ടാകാനും കടുത്ത അണുബാധയ്ക്കും സാധ്യതയുണ്ട്. അതിനാൽ കടിയേറ്റാൽ ഉടൻ തന്നെ കൃത്യമായ ചികിത്സയ്ക്കായി ആശുപത്രിയിൽ എത്തിക്കണം. തങ്ങളുടെ ജീവൻ അപകടത്തിലാണെന്ന് തോന്നിയാൽ മനുഷ്യനെ കടിച്ചുകുടയാനും ശരീരത്തിൽ ചുറ്റിവരിഞ്ഞ് ശ്വാസംമുട്ടിച്ച് എല്ലുകൾ തകർക്കാനും ഇവ ശ്രമിക്കാറുണ്ടെന്നും ഉദ്യോഗസ്ഥർ ഓർമ്മിപ്പിച്ചു. നഗരത്തിന് പുറമെ കുട്ടനാടൻ മേഖലകളിലും പാമ്പ് ശല്യം രൂക്ഷമാണ്. എടത്വ തലവടി പഞ്ചായത്തിലെ 13-ാം വാർഡിൽ തുണ്ടിയിൽ ജോർജുകുട്ടിയുടെ വീട്ടിലെ കോഴിക്കൂട്ടിൽ കയറിക്കൂടിയ വലിയൊരു പെരുമ്പാമ്പിനെ കഴിഞ്ഞ ദിവസം പിടികൂടി. ബുധനാഴ്ച പുലർച്ചെ കോഴികളുടെ അസ്വാഭാവികമായ ശബ്ദം കേട്ട് വീട്ടുകാർ നടത്തിയ അന്വേഷണത്തിലാണ് കൂട്ടിൽ ചുരുണ്ടുകൂടി കിടക്കുന്ന വമ്പൻ പാമ്പിനെ കണ്ടത്. കൂട്ടിലുണ്ടായിരുന്ന ഭൂരിഭാഗം കോഴികളെയും ഇത് അപ്പോഴേക്കും വിഴുങ്ങിയിരുന്നു. തുടർന്ന് സ്നേക്ക് റെസ്ക്യൂ പ്രവർത്തകൻ ചാർലി വർഗ്ഗീസ് സ്ഥലത്തെത്തി പാമ്പിനെ പിടികൂടി വനപാലകർക്ക് കൈമാറി.