ഐപിഎല്ലിൽ നിന്ന് വിരമിക്കൽ പ്രഖ്യാപിച്ച് എം.എസ്. ധോണി… ഇനി സിഎസ്കെയുടെ…

ചെന്നൈ: ഐപിഎല്ലിൽ നിന്ന് വിരമിക്കൽ പ്രഖ്യാപിച്ച് മുൻ ഇന്ത്യൻ നായകനും ചെന്നൈ സൂപ്പർ കിംഗ്സ് താരവുമായ മഹേന്ദ്ര സിങ് ധോണി. അടുത്ത സീസണിൽ പുതിയ റോളിൽ ചെന്നൈ ടീമിനൊപ്പം തുടരുമെന്നും മെന്ററായി പ്രവർത്തിക്കുമെന്നും ധോണി അറിയിച്ചു. വിടവാങ്ങൽ മത്സരം കളിക്കാതെയാണ് താരം ഐപിഎല്ലിനോട് വിടപറയുന്നത്. ചെന്നൈ സൂപ്പർ കിംഗ്സിനും പൂനെ റൈസിങ് സൂപ്പർ ജയന്റ്സിനും വേണ്ടിയാണ് ധോണി ഐപിഎല്ലിൽ കളിച്ചിട്ടുള്ളത്.
278 മത്സരങ്ങളിൽ നിന്ന് 5,439 റൺസാണ് താരം നേടിയത്. ചെന്നൈയ്ക്ക് വേണ്ടി ഏറ്റവും കൂടുതൽ മത്സരങ്ങളിൽ കളിച്ച താരമെന്ന റെക്കോർഡും ധോണിയുടെ പേരിലാണ്. ടീമിനായി ഏറ്റവും കൂടുതൽ റൺസ് നേടിയവരിൽ രണ്ടാം സ്ഥാനത്താണ് അദ്ദേഹം. ധോണിയുടെ നായകത്വത്തിൽ ചെന്നൈ സൂപ്പർ കിംഗ്സ് അഞ്ച് ഐപിഎൽ കിരീടങ്ങൾ സ്വന്തമാക്കി. ഐപിഎൽ ചരിത്രത്തിൽ അഞ്ച് കിരീടങ്ങൾ നേടിയ നായകനെന്ന നേട്ടവും ധോണിക്കുണ്ട്. അവസാന ഓവറുകളിൽ ടീമിനെ വിജയത്തിലെത്തിച്ച നിരവധി പ്രകടനങ്ങളിലൂടെ ആരാധകരുടെ മനസ്സിൽ ഇടം നേടിയ ശേഷമാണ് ധോണി കളിക്കാരനെന്ന നിലയിൽ ഐപിഎല്ലിനോട് വിടപറയുന്നത്. ഇനി ചെന്നൈയുടെ ഉപദേഷ്ടാവെന്ന നിലയിൽ ടീമിനൊപ്പം തുടരും.




