കോൺഗ്രസ് നേതാവിന്റെ ഭാര്യക്ക് വിദ്യാഭ്യാസ വകുപ്പിൽ നിയമനം… അപേക്ഷ ക്ഷണിക്കാതെ…
തിരുവനന്തപുരം: കോൺഗ്രസ് നേതാവും കെ.പി.സി.സി സെക്രട്ടറിയുമായ ബി.ആർ.എം. ഷെഫീറിന്റെ ഭാര്യ ഷാനി ഷെഫീറിന് വിദ്യാഭ്യാസ വകുപ്പിന് കീഴിൽ നിയമനം. സീമാറ്റിൽ (SIEMAT) റിസർച്ച് ഓഫീസറായാണ് നിയമനം നൽകിയിരിക്കുന്നത്. പരസ്യമായി അപേക്ഷ ക്ഷണിക്കാതെ, ലഭിച്ച ബയോഡേറ്റയുടെ അടിസ്ഥാനത്തിലാണ് ജോലി നൽകിയിരിക്കുന്നത്. കരാർ അടിസ്ഥാനത്തിലുള്ള ഈ തസ്തികയിൽ 40,000 രൂപയാണ് പ്രതിമാസ ശമ്പളം.
ഔദ്യോഗിക വിജ്ഞാപനമോ മറ്റ് നടപടിക്രമങ്ങളോ പാലിക്കാതെയാണ് നിയമനം നടത്തിയതെന്ന ആക്ഷേപങ്ങൾ ഉയരുന്നുണ്ട്. എന്നാൽ ഒഴിവ് വന്ന സമയത്ത് ഷാനിയുടെ ബയോഡേറ്റ ലഭിക്കുകയായിരുന്നുവെന്നും, ആ പദവിയിൽ ജോലി ചെയ്യാൻ ആവശ്യമായ യോഗ്യതകൾ ഉണ്ടെന്ന് കണ്ടാണ് നിയമനം നടത്തിയതെന്നുമാണ് സീമാറ്റ് ഡയറക്ടറും അധികൃതരും നൽകുന്ന വിശദീകരണം. സാധാരണയായി സർക്കാരുകൾ അധികാരത്തിൽ വരുമ്പോൾ താല്പര്യമുള്ളവരെ താൽക്കാലിക തസ്തികകളിൽ നിയമിക്കാറുണ്ടെങ്കിലും, അതിൽ പാലിക്കേണ്ട കൃത്യമായ മാനദണ്ഡങ്ങളും സുതാര്യതയുമാണ് ഇവിടെ ചോദ്യം ചെയ്യപ്പെടുന്നത്.
