സംസ്ഥാന സ്കൂൾ കായികമേളയിൽ ഗുരുതര വീഴ്ചയെന്ന് സ്പെഷ്യൽ ബ്രാഞ്ച് റിപ്പോർട്ട്… നീന്തൽ മത്സര വേദിയിലെ മേള….
തൃശൂർ: സംസ്ഥാന സ്‌കൂള്‍ കായിക മേളയുടെ നടത്തിപ്പില്‍ ഗുരുതര വീഴ്ചയെന്ന് സ്പെഷ്യൽ ബ്രാഞ്ച് റിപ്പോര്‍ട്ട്. പൊതുവിദ്യാഭ്യാസ വകുപ്പിനും സംഘാടകര്‍ക്കും ഗുരുതര വീഴ്ച സംഭവിച്ചതായി കാണിച്ച് രഹസ്യാന്വേഷണ വിഭാഗം സർക്കാരിന് റിപ്പോർട്ട് നൽകി. സംഘാടനത്തിലെ പിഴവുകൾ കാരണം തൃശൂരില്‍ നടന്നിരുന്ന നീന്തല്‍ മത്സരം താത്ക്കാലികമായി നിർത്തിവെച്ചിരിക്കുകയാണ്.
മൂന്ന് ദിവസങ്ങളിലായി തൃശൂരില്‍ നടന്ന മത്സരങ്ങളില്‍ പങ്കെടുക്കാനെത്തിയ മത്സരാര്‍ത്ഥികള്‍ക്കും രക്ഷിതാക്കള്‍ക്കും അടിസ്ഥാന സൗകര്യങ്ങള്‍ പോലും ഒരുക്കിയിരുന്നില്ലെന്ന് റിപ്പോർട്ടിൽ വ്യക്തമാക്കുന്നു. ഭക്ഷണം, വിശ്രമ കേന്ദ്രം, മെഡിക്കല്‍ സംവിധാനം തുടങ്ങിയ കാര്യങ്ങളിലെല്ലാം വൻ വീഴ്ചയാണ് സംഭവിച്ചത്. പരാതിയുമായി എത്തിയവര്‍ക്ക് കൃത്യമായ മറുപടി നല്‍കാന്‍ വേദികളില്‍ ഒരു ചുമതലക്കാരന്‍ പോലും ഉണ്ടായിരുന്നില്ല. ഇതിനിടയിലാണ് നീന്തല്‍ മത്സര വേദിയിലെ താത്ക്കാലിക മേല്‍ക്കൂര തകര്‍ന്ന് വീണ് അഞ്ച് കുട്ടികള്‍ക്ക് പരുക്കേറ്റത്. സംഭവത്തെ തുടർന്ന് കടുത്ത പ്രതിഷേധമാണ് വിവിധ കോണുകളിൽ നിന്ന് ഉയരുന്നത്.
സംഘാടർക്കും സംസ്ഥാന സർക്കാരിനുമെതിരെ മുൻമന്ത്രി വി. ശിവൻകുട്ടിയും രംഗത്തെത്തി. സംസ്ഥാന സ്കൂൾ ഗെയിംസ് വേദിയിൽ നിന്ന് ജീവനോടെ തിരിച്ചു വരാനാണ് മത്സരാർത്ഥികൾ ശ്രമിക്കുന്നതെന്നാണ് എസ്എഫ്ഐ സംസ്ഥാന സെക്രട്ടറി പി.എസ്. സഞ്ജീവ് പരിഹസിച്ചത്. എന്നാൽ മേളയുടെ സംഘാടനത്തിൽ കായിക വകുപ്പിന് ഒരു പങ്കുമില്ലെന്ന് വകുപ്പ് മന്ത്രി ഒ.ജെ. ജനീഷ് പ്രതികരിച്ചു. സംഭവത്തില്‍ സമഗ്രമായ അന്വേഷണം വേണമെന്ന് പ്രതിപക്ഷ നേതാവ് പിണറായി വിജയനും ആവശ്യപ്പെട്ടിട്ടുണ്ട്.
