പാക്കിസ്ഥാനില് നിന്ന് ഇന്ത്യയിലേക്ക് പഞ്ചസാര എത്തുമോ?
ആഭ്യന്തര വിപണിയില് വില കുതിച്ചുയരുന്ന സാഹചര്യത്തില് ഇന്ത്യ പഞ്ചസാരയുടെ ഇറക്കുമതി തീരുവ ഒഴിവാക്കിയതിന് പിന്നാലെ, തങ്ങളുടെ പക്കലുള്ള അധിക സ്റ്റോക്ക് ഇന്ത്യയിലേക്ക് കയറ്റുമതി ചെയ്യാന് അനുവദിക്കണമെന്ന് പാക് സര്ക്കാരിനോട് ആവശ്യപ്പെട്ട് പാക്കിസ്ഥാനിലെ പഞ്ചസാര വ്യവസായികള്. ഇരു രാജ്യങ്ങളും തമ്മിലുള്ള വ്യാപാര ബന്ധം മരവിച്ചു കിടക്കുന്ന സാഹചര്യത്തിലാണ് ഈ അപ്രതീക്ഷിത നീക്കം.
വിലക്കയറ്റം നിയന്ത്രിക്കുന്നതിനായി 2026 ഒക്ടോബര് 31 വരെ 10 ലക്ഷം മെട്രിക് ടണ് അസംസ്കൃത പഞ്ചസാര തീരുവയില്ലാതെ ഇറക്കുമതി ചെയ്യാന് വ്യാഴാഴ്ചയാണ് കേന്ദ്ര സര്ക്കാര് അനുമതി നല്കിയത്. ഡയറക്ടറേറ്റ് ജനറല് ഓഫ് ഫോറിന് ട്രേഡ് ആണ് ഇത് സംബന്ധിച്ച വിജ്ഞാപനം ഇറക്കിയത്. വര്ഷങ്ങളായി ഇറക്കുമതി നിയന്ത്രണങ്ങളുണ്ടായിരുന്ന ഇന്ത്യന് വിപണിയിലെ സുപ്രധാന മാറ്റമാണിത്
