ഗർഭിണികളായ വനിതാ പൊലീസുകാർക്ക് ഇനി….

തിരുവനന്തപുരം: ഗർഭിണികളായ വനിതാ പൊലീസുകാരുടെ യൂണിഫോമിൽ മാറ്റം. ഗർഭകാലത്ത് കാക്കി സൽവാർ കമ്മീസ്, ഷാൾ, സാൻഡൽ എന്നിവ ധരിക്കാൻ അനുമതി നൽകി പൊലീസ് ആസ്ഥാനം ഉത്തരവിറക്കി. പൊലീസ് ആസ്ഥാനത്തെ ഐജി ഹർഷിത അത്തല്ലൂരിയാണ് ഇതുസംബന്ധിച്ച ഉത്തരവ് പുറത്തിറക്കിയത്. സംസ്ഥാനത്തെ പൊലീസ് ഉദ്യോഗസ്ഥർക്ക് നിലവിൽ പൊതുവായ യൂണിഫോം കോഡാണ് നിലവിലുള്ളത്.

ഗർഭകാലത്ത് പാന്റ്സും ഷർട്ടും ധരിക്കുന്നതുമൂലം ഉണ്ടാകുന്ന ബുദ്ധിമുട്ടുകൾ സംബന്ധിച്ച് വനിതാ പൊലീസുകാരിൽനിന്ന് നിരവധി പരാതികൾ ഉയർന്നിരുന്നു. ഇതിന് പിന്നാലെയാണ് യൂണിഫോമിൽ ഇളവ് അനുവദിച്ച് ഉത്തരവിറക്കിയത്. പുതിയ ഉത്തരവ് പ്രകാരം ഗർഭകാലത്ത് ഡ്യൂട്ടിക്കെത്തുന്ന വനിതാ പൊലീസുകാർക്ക് കാക്കി സൽവാർ കമ്മീസും ഷാളും ധരിക്കാം. ഷൂസിന് പകരം സാൻഡൽ ധരിക്കാനും അനുമതിയുണ്ട്. ഗർഭകാലത്തെ ശാരീരിക ബുദ്ധിമുട്ടുകൾ പരിഗണിച്ചാണ് യൂണിഫോം പരിഷ്കരിച്ചിരിക്കുന്നത്.