മിഠായി വാങ്ങാൻ പോയ 11 വയസുകാരന് നേരെ ക്രൂരത… കടയുടമയ്ക്ക് 20 വർഷം കഠിനതടവും പിഴയും വിധിച്ച് കോടതി

കോഴിക്കോട്: പതിനൊന്നു വയസുള്ള ആൺകുട്ടിയെ കടയ്ക്കുള്ളിൽ വെച്ച് ലൈംഗികമായി പീഡിപ്പിച്ച കേസിൽ പ്രതിയായ കടയുടമയ്ക്ക് ഇരുപത് വർഷം കഠിന തടവും മുപ്പതിനായിരം രൂപ പിഴയും വിധിച്ച് കോടതി. വടകര കൈനാട്ടി ചേക്കിന്റെവിടെ വീട്ടിൽ നാസർ (53) എന്നയാളെയാണ് കൊയിലാണ്ടി ഫാസ്റ്റ് ട്രാക്ക് സ്‌പെഷ്യൽ കോടതി ജഡ്ജി കഠിനശിക്ഷയ്ക്ക് വിധിച്ചത്. പോക്‌സോ നിയമപ്രകാരമുള്ള വിവിധ വകുപ്പുകളും ഇന്ത്യൻ ശിക്ഷാ നിയമത്തിലെ വകുപ്പുകളും ചുമത്തിയാണ് കോടതി പ്രതിക്ക് കനത്ത ശിക്ഷ നൽകിയത്.

കഴിഞ്ഞ 2022-ലാണ് നാടിനെ നടുക്കിയ കേസിനാസ്പദമായ സംഭവം നടക്കുന്നത്. പ്രതിയായ നാസറിന്റെ കടയിലേക്ക് മിഠായി വാങ്ങാനായാണ് പതിനൊന്നുകാരനായ കുട്ടി പോകുന്നത്. ഈ സമയം കടയിൽ മറ്റാരും ഇല്ലാതിരുന്ന അവസരം മുതലെടുത്ത് നാസർ കുട്ടിയെ ബലം പ്രയോഗിച്ച് കടയുടെ ഉൾഭാഗത്തേക്ക് കൂട്ടിക്കൊണ്ടുപോവുകയായിരുന്നു. തുടർന്ന് കുട്ടിയെ ഇയാൾ ക്രൂരമായി ലൈംഗിക പീഡനത്തിന് ഇരയാക്കി. കടയിൽ നിന്നും രക്ഷപ്പെട്ട് വീട്ടിലെത്തിയ കുട്ടി തനിക്കുണ്ടായ ദാരുണമായ അനുഭവം ഉമ്മയോട് തുറന്നുപറഞ്ഞു. കുട്ടിയുടെ വാക്കുകൾ കേട്ട ഉമ്മ ഉടൻ തന്നെ ബന്ധുക്കളുടെ സഹായത്തോടെ പോലീസിനെ സമീപിക്കുകയായിരുന്നു.

സംഭവത്തിൽ പയ്യോളി പോലീസ് സ്റ്റേഷനിലാണ് ആദ്യം കേസ് രജിസ്റ്റർ ചെയ്തത്. അന്നത്തെ പയ്യോളി പോലീസ് സർക്കിൾ ഇൻസ്‌പെക്ടർ സുഭാഷ് ബാബു കെ. സി. യുടെ നേതൃത്വത്തിലുള്ള പ്രത്യേക സംഘമാണ് കേസ് അന്വേഷിച്ച് കുറ്റപത്രം സമർപ്പിച്ചത്. വിചാരണ വേളയിൽ ശാസ്ത്രീയ തെളിവുകളും കുട്ടിയുടെ മൊഴിയും കൃത്യമായി കോടതിക്ക് മുന്നിൽ എത്തിക്കാൻ അന്വേഷണ സംഘത്തിന് കഴിഞ്ഞു. തുടർന്ന് നടന്ന വിചാരണയ്ക്കൊടുവിലാണ് പ്രതി കുറ്റക്കാരനാണെന്ന് കോടതി കണ്ടെത്തിയത്. പിഴ തുകയടച്ചില്ലെങ്കിൽ പ്രതി കൂടുതൽ കാലം ജയിൽ ശിക്ഷ അനുഭവിക്കേണ്ടി വരും. പ്രോസിക്യൂഷന് വേണ്ടി കോടതിയിൽ അഡ്വ. ജെതിൻ പി. ഹാജരായി. കുട്ടികൾക്കെതിരെയുള്ള അതിക്രമങ്ങളിൽ കടുത്ത നടപടികളുമായി മുന്നോട്ട് പോകുമെന്ന മുന്നറിയിപ്പാണ് ഈ കോടതി വിധി നൽകുന്നത്.