‘ആ സംഭവം മറക്കാനാവില്ല’…. ഗൺമാൻമാരുടെ മർദ്ദനത്തിൽ പുനരന്വേഷണം…. പ്രത്യേക സംഘത്തെ പ്രഖ്യാപിച്ച് സതീശൻ സർക്കാർ
തിരുവനന്തപുരം: 2023-ലെ നവകേരള യാത്രയ്ക്കിടെ കരിങ്കൊടി കാണിച്ച പ്രതിഷേധക്കാരെ മുഖ്യമന്ത്രിയുടെ ഗൺമാൻമാർ മർദ്ദിച്ച സംഭവത്തിൽ പ്രത്യേക അന്വേഷണ സംഘത്തെ നിയോഗിക്കാൻ വി.ഡി. സതീശൻ മന്ത്രിസഭ തീരുമാനിച്ചു. അധികാരമേറ്റ ശേഷമുള്ള ആദ്യ മന്ത്രിസഭാ യോഗത്തിലാണ് ഈ നിർണ്ണായക ഉത്തരവ് പുറപ്പെടുവിച്ചത്.
2023 ഡിസംബർ 15-ന് ആലപ്പുഴയിൽ വെച്ചാണ് വിവാദമായ സംഭവം നടന്നത്. അന്നത്തെ മുഖ്യമന്ത്രി പിണറായി വിജയന് നേരെ കരിങ്കൊടി കാണിച്ച് പ്രതിഷേധിച്ച യൂത്ത് കോൺഗ്രസ് പ്രവർത്തകരെ സുരക്ഷാ ഉദ്യോഗസ്ഥർ വളഞ്ഞിട്ട് മർദ്ദിക്കുകയായിരുന്നു. സംഭവത്തിന്റെ ദൃശ്യങ്ങൾ വ്യാപകമായി പ്രചരിച്ചെങ്കിലും, ഭരണപക്ഷത്തിന്റെ ഭാഗത്തുനിന്ന് ഉദ്യോഗസ്ഥരെ സംരക്ഷിക്കുന്ന നിലപാടാണ് ഉണ്ടായതെന്ന് പരാതി ഉയർന്നിരുന്നു. സംഭവത്തിൽ തെളിവില്ലെന്ന വാദങ്ങൾ തള്ളി, ദൃശ്യങ്ങൾ പരിശോധിച്ച് ആലപ്പുഴ മജിസ്ട്രേറ്റ് കോടതി 2024 നവംബർ 8-ന് പുനരന്വേഷണത്തിന് ഉത്തരവിട്ടിരുന്നു. എന്നാൽ മാസങ്ങൾ പിന്നിട്ടിട്ടും മുൻ സർക്കാർ നടപടികൾ സ്വീകരിച്ചിരുന്നില്ല.
ഇതൊരു രാഷ്ട്രീയ പ്രതികാരമല്ലെന്നും മറിച്ച് നീതി ഉറപ്പാക്കാനുള്ള നടപടിയാണെന്നും മുഖ്യമന്ത്രി വി.ഡി. സതീശൻ വ്യക്തമാക്കി. “ആ സംഭവം അത്ര പെട്ടെന്ന് മറക്കാൻ കഴിയില്ല” എന്ന് അദ്ദേഹം പത്രസമ്മേളനത്തിൽ കൂട്ടിച്ചേർത്തു. ആഭ്യന്തര വകുപ്പ് ഉടൻ തന്നെ പ്രത്യേക അന്വേഷണ സംഘത്തെ പ്രഖ്യാപിക്കും. ഉദ്യോഗസ്ഥരുടെ ഭാഗത്തുനിന്നുള്ള വീഴ്ചകളും നിയമലംഘനങ്ങളും എസ്.ഐ.ടി. വിശദമായി പരിശോധിക്കും.
