ആലപ്പുഴയിൽ അധ്യാപികയ്ക്ക് അണലിയുടെ കടിയേറ്റു….
ആലപ്പുഴ: സംസ്ഥാനത്ത് പാമ്പുകടിയേറ്റുള്ള അപകടങ്ങൾ തുടർച്ചയാകുന്നു. ആലപ്പുഴ പള്ളിപ്പാട് സ്കൂൾ അധ്യാപികയ്ക്കാണ് ഏറ്റവും ഒടുവിലായി പാമ്പുകടിയേറ്റത്. പള്ളിപ്പാട് തെക്കേക്കര കിഴക്ക് ദേവമംഗലത്ത് വീട്ടിൽ സിന്ധുവിനാണ് അണലിയുടെ കടിയേറ്റത്. ഞായറാഴ്ച രാത്രി വീടിന് മുൻവശത്തെ ഗേറ്റ് അടയ്ക്കാൻ പുറത്തിറങ്ങിയപ്പോഴാണ് സിന്ധുവിനെ പാമ്പ് കടിച്ചത്. ഇരുട്ടിൽ ഒളിച്ചിരുന്ന അണലിയാണ് ആക്രമിച്ചത്. ഉടൻ തന്നെ ഇവരെ കായംകുളത്തെ സ്വകാര്യ ആശുപത്രിയിൽ പ്രവേശിപ്പിച്ചു. നിലവിൽ ആന്റിവെനം നൽകി വിദഗ്ധ ചികിത്സ ലഭ്യമാക്കിയിട്ടുണ്ട്. നങ്ങ്യാർകുളങ്ങര എസ്.എൻ. ട്രസ്റ്റ് സ്കൂളിലെ അധ്യാപികയാണ് സിന്ധു.
സംസ്ഥാനത്തിന്റെ വിവിധ ഭാഗങ്ങളിൽ സമാനമായ സംഭവങ്ങൾ റിപ്പോർട്ട് ചെയ്യുന്നത് ജനങ്ങളിൽ വലിയ ആശങ്ക സൃഷ്ടിക്കുന്നുണ്ട്. മഴക്കാലം പടിവാതിൽക്കൽ നിൽക്കെ പാമ്പുകൾ ജനവാസ മേഖലകളിലേക്കും വീട്ടുപരിസരങ്ങളിലേക്കും വ്യാപകമായി ഇറങ്ങുന്ന സാഹചര്യത്തിൽ പൊതുജനങ്ങൾ അതീവ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകുന്നു. ഇരിങ്ങാലക്കുട കാറളത്ത് ഇന്ന് രാവിലെ രണ്ട് പേർക്ക് പാമ്പുകടിയേറ്റു. പുല്ല് നീക്കം ചെയ്യുന്നതിനിടെ പ്രസീത എന്ന സ്ത്രീക്കും, കിണർ നിർമ്മാണ തൊഴിലാളിയായ സനീഷ് എന്നയാൾക്കുമാണ് കടിയേറ്റത്. ഇരുവരെയും ഇരിങ്ങാലക്കുടയിലെ ആശുപത്രികളിൽ പ്രവേശിപ്പിച്ചു.
ചിറയിൻകീഴ് പെരുംകുഴി സ്വദേശി ഭുവനചന്ദ്രന് പാമ്പുകടിയേറ്റു. ഇദ്ദേഹത്തെ മെഡിക്കൽ കോളേജ് ആശുപത്രിയിൽ വിദഗ്ധ ചികിത്സയ്ക്കായി മാറ്റിയിട്ടുണ്ട്. കടിയേറ്റ സംഭവങ്ങൾക്ക് പുറമെ വിവിധയിടങ്ങളിൽ നിന്ന് അപകടകാരികളായ പാമ്പുകളെ പിടികൂടുകയും ചെയ്തു. താഴെ ചൊവ്വയിലെ ഒരു പഴക്കടയിൽ പഴക്കുലകൾ മാറ്റുന്നതിനിടെയാണ് മൂർഖൻ പാമ്പിനെ കണ്ടെത്തിയത്. തലനാരിഴയ്ക്കാണ് കച്ചവടക്കാർ രക്ഷപ്പെട്ടത്. കാരശ്ശേരി പഞ്ചായത്തിലെ നെല്ലിക്കാപറമ്പ് അങ്കണവാടിക്ക് സമീപമുള്ള വീട്ടുവളപ്പിൽ നിന്നും മൂർഖൻ പാമ്പിനെ പിടികൂടി. വനം വകുപ്പിന്റെ സ്നേക്ക് റെസ്ക്യൂവർമാരെത്തിയാണ് രണ്ട് സ്ഥലങ്ങളിൽ നിന്നും പാമ്പുകളെ നീക്കം ചെയ്തത്. മഴയും കാലാവസ്ഥാ മാറ്റവും പാമ്പുകൾ ജനവാസ മേഖലയിലേക്ക് ഇറങ്ങാൻ കാരണമാകുന്നുണ്ടെന്നും, പറമ്പിലും വീട്ടുപരിസരത്തും നിൽക്കുമ്പോൾ അതീവ ജാഗ്രത പാലിക്കണമെന്നും അധികൃതർ നിർദ്ദേശിക്കുന്നു.
