‘വിവാഹം ലൗ ജിഹാദ് അല്ല…പ്രായത്തെക്കുറിച്ചുള്ള ആരോപണം തെറ്റ്…മൊണാലിസ ഭോസ്ലെ
തിരുവനന്തപുരം: തങ്ങളുടെ വിവാഹം ലൗ ജിഹാദ് എന്ന് ആരോപിക്കുന്നുണ്ടെന്നും എന്നാല് അങ്ങനെ അല്ലെന്നും സോഷ്യല് മീഡിയയിലെ വൈറല് താരം മൊണാലിസ ഭോസ്ലെ. എല്ലാവരും വന്നതില് സന്തോഷമുണ്ട്. എല്ലാവരുടെയും അനുഗ്രഹം കൊണ്ടാണ് തങ്ങളുടെ ആഗ്രഹം സാധിച്ചത്. കുടുംബം മറ്റൊരു വിവാഹത്തിന് നിര്ബന്ധിച്ചു. അതുകൊണ്ടാണ് ഇങ്ങനെ വിവാഹം കഴിച്ചത്. അച്ഛന് കേരളത്തില് ഉണ്ട്. തിരിച്ചുപോയോ എന്ന് അറിയില്ല. അച്ഛനെ ഇന്നലെ കണ്ടിരുന്നു, എന്നാല് വിവാഹത്തിന് എത്തിയില്ലെന്നും മൊണാലിസ പറഞ്ഞു.
പ്രായത്തെക്കുറിച്ചുള്ള ആരോപണവും ഇരുവരും തള്ളി. മതം മാറിയിട്ടില്ലെന്നും മോണാലിസയുടെ ആഗ്രഹ പ്രകാരമാണ് ഹിന്ദു രീതിയില് വിവാഹം കഴിച്ചതെന്നും പങ്കാളി മുഹമ്മദ് ഫര്മാനും പ്രതികരിച്ചു. മലയാള സിനിമയുടെ ചിത്രീകരണ വേളയിലാണ് മോണാലിസയെ പരിചയപ്പെട്ടത്. ഹിന്ദി മാധ്യമങ്ങള് ലൗ ജിഹാദ് ആണെന്നാണ് ആരോപിക്കുന്നത്. എന്നാല് അങ്ങനെ അല്ല. ഉടന് തിരിച്ചു പോകുന്ന കാര്യം ആലോചിച്ചിട്ടില്ല. കേരളത്തില് നിന്ന് വലിയ പിന്തുണ ലഭിച്ചു. കെ സ്മാര്ട്ടിലാണ് വിവാഹം രജിസ്റ്റര് ചെയ്തത്. പൂവാര് പഞ്ചായത്തിലെ വിലാസമാണ് നല്കിയിരിക്കുന്നത്.
കെ സ്മാര്ട്ട് വഴി ഒരു മണിക്കൂറിനുള്ളില് വിവാഹ സര്ട്ടിഫിക്കറ്റ് ലഭിച്ചുവെന്നും ഫര്മാന് പറഞ്ഞു. എം വി ഗോവിന്ദനും, എ എ റഹീമിനും ഇരുവരും നന്ദിയും അറിയിച്ചു.
