ബുൾഡോസർ രാജ് പ്രയോഗിച്ചതിലൂടെ കോൺഗ്രസ് തകർത്തത് ചരിത്രവും വിപ്ലവകരവുമായ ഒരു പോരാട്ടത്തിന്റെ സ്മരണകളെ..എ എ റഹീം

തിരുവനന്തപുരം : തെലങ്കാനയിൽ വീടുകൾ ഒഴിപ്പിക്കാൻ ബുൾഡോസർ രാജ് പ്രയോഗിച്ചതിൽ കോൺഗ്രസിനെതിരെ രൂക്ഷവിമർശനവുമായി എ എ റഹീം എംപി. ‘ബുൾഡോസർ രാജ്’ ജനാധിപത്യ വിശ്വാസികളെ തെല്ലൊന്നുമല്ല ആശങ്കപ്പെടുത്തുന്നതെന്നും ബിജെപി ഭരിക്കുന്ന ഉത്തരേന്ത്യൻ സംസ്ഥാനങ്ങളിൽ കണ്ടുവരുന്ന അതേ കിരാതമായ ഭരണശൈലി ഇപ്പോൾ കോൺഗ്രസ് സർക്കാരുകളും ഏറ്റെടുത്തിരിക്കുകയാണെന്നും എ എ റഹീം പറഞ്ഞു. ഫേസ്ബുക്കിലൂടെയായിരുന്നു പ്രതികരണം.

അരികുവൽക്കരിക്കപ്പെട്ട മനുഷ്യർക്ക് വിനോബ ഭാവെ വിഭാവനം ചെയ്ത ഭൂദാന പ്രസ്ഥാനത്തിലൂടെ ലഭിച്ച ഭൂമിയിൽ പണിതുയർത്തിയ വീടുകളാണ് ഒരു ദാക്ഷിണ്യവുമില്ലാതെ കോൺഗ്രസ് സർക്കാർ തകർത്തെറിഞ്ഞത്. ഫെബ്രുവരി 25-ന് പുലർച്ചെ പൊലീസ് സന്നാഹത്തോടെ വിനോബ നഗറിൽ ഇരച്ചുകയറിയ ബുൾഡോസറുകൾ ആയിരക്കണക്കിന് മനുഷ്യരെയാണ് പെരുവഴിയിലാക്കിയതെന്നും അദ്ദേഹം പറഞ്ഞു.