ഹോംവർക്ക് പൂർത്തിയാക്കിയില്ല…എൽകെജി വിദ്യാർത്ഥിയെ നഗ്നനാക്കി കയർ കൊണ്ട് മരത്തിൽ കെട്ടിത്തൂക്കി….
ഗൃഹപാഠം പൂർത്തിയാക്കാത്തതിന് നാല് വയസ്സുള്ള എൽകെജി വിദ്യാർത്ഥിയെ രണ്ട് അധ്യാപികമാർ മരത്തിൽ കെട്ടിത്തൂക്കി. സൂരജ്പൂരിലെ ഒരു ഗ്രാമത്തിലെ ഹാൻസ് വാഹിനി വിദ്യാ മന്ദിറിലാണ് സംഭവം. സംഭവത്തിന്റെ വീഡിയോ സമൂഹ മാധ്യമത്തിൽ വൈറലായതോടെ പ്രതിഷേധം ആളിക്കത്തി. മരത്തിൽ കുട്ടിയെ നഗ്നനാക്കി കയർ കൊണ്ട് കെട്ടി തൂക്കിയെന്നാണ് വിവരം. സ്‌കൂളുകളിലെ കുട്ടികളുടെ സുരക്ഷയെക്കുറിച്ച് അസ്വസ്ഥതയുണ്ടാക്കുന്ന ചോദ്യങ്ങൾ ഉയർത്തുന്ന ഒരു ഞെട്ടിക്കുന്ന സംഭവമാണിത്.
അതേസമയം രണ്ട് അധ്യാപകരെയും സസ്പെൻഡ് ചെയ്തതായി സ്കൂൾ മാനേജർ അറിയിച്ചു. സംഭവത്തിൽ വിദ്യാഭ്യാസ വകുപ്പ് അന്വേഷണം ആരംഭിച്ചിട്ടുണ്ട്. കുട്ടിയെ ഒരു കയര്‍ ഉപയോഗിച്ച് കെട്ടി മരത്തിന്‍റെ കൊമ്പിൽ കെട്ടിത്തൂക്കുകയായിരുന്നു. സ്കൂള്‍ പരിസരത്ത് തന്നെയുള്ള ഒരു മരത്തിലാണ് കുട്ടിയെ കെട്ടിത്തൂക്കിയത്. സംഭവം നടക്കുമ്പോൾ പരിസരത്ത് ഉണ്ടായിരുന്ന ഒരു യുവാവാണ് ദൃശ്യങ്ങൾ പകര്‍ത്തിയതും സമൂഹ മാധ്യമങ്ങളില്‍ പ്രചരിപ്പിച്ചതും. യുവാവ് ദൃശ്യങ്ങൾ പകർത്തുന്നത് തടയാൻ രണ്ട് അധ്യാപികമാരും ശ്രമിക്കുന്നതും പ്രചരിച്ച വീഡിയോയിൽ കാണാം.
കുട്ടി സുരക്ഷിതനാണെന്നും പരിക്കുകളൊന്നുമില്ലെന്നും റിപ്പോർട്ടുണ്ടെങ്കിലും, സംഭവം രക്ഷിതാക്കളിലും, ആക്ടിവിസ്റ്റുകളിലും, പൊതുജനങ്ങളിലും രോഷം ജനിപ്പിച്ചിട്ടുണ്ട്. അധ്യാപകർക്കെതിരെ മാത്രമല്ല, സ്‌കൂളിന്റെ പരിസരത്ത് ഇത്രയും ക്രൂരമായ ശിക്ഷ അനുവദിച്ചതിന് സ്‌കൂളിനെതിരെയും കർശന നടപടി സ്വീകരിക്കണമെന്ന് പലരും ആവശ്യപ്പെടുന്നു.
