തൃശ്ശൂരിൽ കോൺഗ്രസ് നേതാവും ഭാര്യയും സിപിഎമ്മിൽ

കോൺഗ്രസ് ബ്ലോക്ക് കമ്മിറ്റി മുൻ ജനറൽ സെക്രട്ടറിയും ഭാര്യയും സിപിഎമ്മിൽ ചേർന്നു. കോൺഗ്രസ് ബ്ലോക്ക് ജനറൽ സെക്രട്ടറിയായിരുന്ന തോബി തോട്ടിയാനും ഭാര്യ ടീനയുമാണ് സിപിഎമ്മിൽ ചേർന്ന് പ്രവർത്തിക്കാൻ തീരുമാനിച്ചത്. പുതുക്കാട് ഗ്രാമപഞ്ചായത്തിലെ കോൺഗ്രസ് അംഗമാണ് ടീന. പഞ്ചായത്തിലെ മുൻ അംഗമാണ് തോബി തോട്ടിയാൻ. ഇരുവരും പാർട്ടിയിൽ ചേർന്നതിന് പിന്നാലെ തോബി തോട്ടിയാനെ ചെങ്ങാലൂർ എസ്.എൻ. പുരം വാർഡിൽ ഇടതു സ്വതന്ത്ര സ്ഥാനാർത്ഥിയായി പ്രഖ്യാപിച്ചു.

പഞ്ചായത്ത് പ്രസിഡന്റിന്റെ ഏകാധിപത്യ നടപടികളാണ് പഞ്ചായത്തിൽ നടപ്പാക്കുന്നതെന്ന് ആരോപിച്ചാണ് ഇരുവരും കോൺഗ്രസ് വിട്ടത്. പുതുക്കാട് പഞ്ചായത്തിൽ ടീന അംഗമായ വാർഡിലാണ് തോബി ഇത്തവണ എൽഡിഎഫ് സ്ഥാനാർത്ഥിയായി മത്സരിക്കുന്നത്. നേരത്തേ രണ്ടുതവണ തോബിയും ഇവിടെ വിജയിച്ചിരുന്നു. യൂത്ത് കോൺഗ്രസ് മണ്ഡലം വൈസ് പ്രസിഡന്റാണ് ടീന. തോബിക്കും ടീനയ്ക്കും കെ.കെ. രാമചന്ദ്രൻ എം.എൽ.എ, സി പി എം. കൊടകര ഏരിയ സെക്രട്ടറി പി.കെ. ശിവരാമൻ, ജില്ലാകമ്മിറ്റി അംഗം ടി.എ. രാമകൃഷ്ണൻ എന്നിവരുടെ നേതൃത്വത്തിൽ ഏരിയ കമ്മിറ്റി ഓഫീസിൽ സ്വീകരണം നൽകി.