മോഹൻലാലിന്റെ താടി ദേശീയ പ്രശ്നമാകുന്നു..

നടൻ മോഹൻലാലിന്റെ താടി ദേശീയ പ്രശ്നമാകുന്നു. താരം താടിവടിക്കാത്തതാണ് ഇപ്പോൾ പ്രതിരോധ കേന്ദ്രങ്ങളിൽ ഉൾപ്പെടെ ചർച്ചയാകുന്നത്. ടെറിട്ടോറിയൽ ആർമിയിൽ ലഫ്.കേണൽ (ഓണററി) ആണ് മോഹൻലാൽ. ദാദാ സാഹേബ് ഫാൽക്കെ പുരസ്കാരം നേടിയതിന് പിന്നാലെ താരത്തെ കരസേനാ മേധാവി ജനറൽ ഉപേന്ദ്ര ദ്വിവേദി കമൻഡേഷൻ കാർഡ് നൽകി ആദരിച്ചിരുന്നു. ഈ ചടങ്ങാണ് ഇപ്പോൾ വിവാദമാകുന്നത്.

കരസേനാ മേധാവി ജനറൽ ഉപേന്ദ്ര ദ്വിവേദി കമൻഡേഷൻ കാർഡ് നൽകി ആദരിക്കുന്ന ചടങ്ങിൽ മോഹൻലാൽ താടി വടിക്കാതെയാണ് എത്തിയത്. അതേസമയം, സൈനിക യൂണിഫോമിൽ ക്യാപ് അണിഞ്ഞാണ് താരം ചടങ്ങിനെത്തിയത്. സൈനിക യൂണിഫോം ധരിക്കുമ്പോൾ താടി വടിച്ചിരിക്കണമെന്നാണു ചട്ടം.

യൂണിഫോം ധരിക്കുമ്പോൾ ശ്രദ്ധിക്കേണ്ട കാര്യങ്ങളെക്കുറിച്ചു സേനാ ആസ്ഥാനത്തുനിന്നു കൃത്യമായ ഉപദേശം നൽകണമെന്നു ചിത്രം പങ്കിട്ട് നാവികസേന മുൻ മേധാവി അഡ്മിറൽ (റിട്ട) അരുൺ പ്രകാശ് സമൂഹമാധ്യമത്തിൽ കുറിച്ചു. സമാന വിമർശനം പല മുതിർന്ന സൈനിക ഉദ്യോഗസ്ഥരും ഉയർത്തി. സിഖ് വിഭാഗക്കാർക്കു മാത്രമാണു താടിയുടെ കാര്യത്തിൽ ഇളവുള്ളത്.