സ്വർണ്ണം കൈക്കലാക്കി നാട്ടിലേക്ക് തിരിച്ചയച്ചു… ഒടുവിൽ ഭാര്യയെ വീഡിയോ കോളിലൂടെ മുത്വലാഖ്‌ ചൊല്ലി…
വിവാഹം കഴിഞ്ഞ് യുകെയിലേക്ക് കൊണ്ടുപോയ ഭാര്യയുടെ സ്വർണ്ണം കൈക്കലാക്കി നാട്ടിലേക്ക് തിരിച്ചയച്ചു. പിന്നീട് വീഡിയോകോൾ ചെയ്ത് യുവതിയെ മുത്വലാഖ്‌ ചൊല്ലി. മുംബൈ സ്വദേശിയായ യുവതിയെയാണ് യുകെയിലുള്ള ഭർത്താവ് വീഡിയോ കോളിലൂടെ വിവാഹബന്ധം വേർപെടുത്തിയത്. ഇതെത്തുടർന്ന് യുവതി ഭർത്താവായ ആകിബ് ഭട്ടിവാലയ്ക്കെതിരെ പൊലീസിൽ പരാതി നൽകി. ഭർതൃവീട്ടുകാർ സ്ത്രീധനമാവശ്യപ്പെട്ട് നിരന്തരം പീഡിപ്പിച്ചിരുന്നതായി മുംബൈയിലെ എൻആർഐ സാഗർ പോലീസിന് നൽകിയ പരാതിയിൽ പറയുന്നു.
2022 ൽ മുസ്ലീം മതനിയമ പ്രകാരമായിരുന്നു ഇരുവരുടെയും വിവാഹം. വഡാലയിലുള്ള ഭർതൃവീട്ടിലേക്ക് താമസം മാറിയ ശേഷമാണ് വീട്ടുകാരുടെ പീഡനം ആരംഭിച്ചതെന്ന് യുവതി പറയുന്നു. ഭർത്താവിനും അമ്മായിയമ്മയ്‌ക്കുമൊപ്പം ഇംഗ്ലണ്ടിലേക്ക് പോയതോടെ സ്ഥിതി കൂടുതൽ വഷളായി. ഭർത്താവ് ആഭരണങ്ങൾ കൈക്കലാക്കി യുവതിയെ ഇന്ത്യയിലേക്ക് തിരിച്ചയച്ചു. നാട്ടിലെത്തിയപ്പോൾ ഭർത്താവിന്റെ വീട്ടിൽ താമസിക്കാൻ അനുവദിച്ചില്ലെന്നും ഇവർ ആരോപിക്കുന്നു.
പലതവണ ആകിബിനെ ബന്ധപ്പെടാൻ ശ്രമിച്ചുവെങ്കിലും കഴിഞ്ഞില്ല. പിന്നീട് ഇയാൾ യുവതിയെ വീഡിയോ കോൾ ചെയ്ത് മുത്വലാഖ്‌ ചൊല്ലുകയായിരുന്നു. എന്നാൽ ആഭരണങ്ങൾ തിരികെ നൽകാൻ ആവശ്യപ്പെട്ടിട്ടും ഭർതൃവീട്ടുകാർ തയ്യാറായില്ലെന്ന് യുവതി പറഞ്ഞു. ഇവരുടെ പരാതിയിൽ പൊലീസ് കേസെടുത്ത് അന്വേഷണം ആരംഭിച്ചു.
