‘അന്ന് സതീശൻ ആവശ്യപ്പെട്ടത് ഇന്ന് ചെയ്യണം…. ഇന്ധന നികുതി 10 രൂപയെങ്കിലും കുറയ്ക്കാൻ സർക്കാർ തയ്യാറാകണം’…… കെ. സുരേന്ദ്രൻ
സംസ്ഥാനത്ത് വർദ്ധിച്ചുവരുന്ന വിലക്കയറ്റത്തിലും ഇന്ധനക്കൊള്ളയിലും മുഖ്യമന്ത്രി വി.ഡി. സതീശനും സംസ്ഥാന സർക്കാരിനുമെതിരെ കടുത്ത വിമർശനവുമായി ബി.ജെ.പി സംസ്ഥാന പ്രസിഡന്റ് കെ. സുരേന്ദ്രൻ. കേരളത്തിൽ ഇന്ധനവില കുറയ്ക്കാൻ സംസ്ഥാന സർക്കാർ ഈടാക്കുന്ന അധിക നികുതി വേണ്ടെന്നുവെക്കാൻ തയ്യാറാകണമെന്നും പെട്രോളിനും ഡീസലിനും ജനങ്ങൾക്ക് ആശ്വാസമായി കുറഞ്ഞത് 10 രൂപയെങ്കിലും കുറയ്ക്കണമെന്നും അദ്ദേഹം ആവശ്യപ്പെട്ടു.
പ്രതിപക്ഷ നേതാവായിരുന്ന കാലത്ത് വി.ഡി. സതീശൻ നിരന്തരം ആവശ്യപ്പെട്ട കാര്യം തന്നെയാണ് താൻ ഇപ്പോൾ ഉന്നയിക്കുന്നത്. അദ്ദേഹം മുഖ്യമന്ത്രിയായ സാഹചര്യത്തിൽ ഈ നികുതി കുറയ്ക്കാൻ തയ്യാറായില്ലെങ്കിൽ അത് ജനങ്ങളോടുള്ള ശുദ്ധമായ ഇരട്ടത്താപ്പാണെന്ന് ജനങ്ങൾ കരുതുമെന്നും സുരേന്ദ്രൻ ഓർമ്മിപ്പിച്ചു. സംസ്ഥാന സർക്കാരിന്റെ വരുമാനം മാത്രം ലക്ഷ്യമിട്ട് ജനങ്ങളെ പിഴുതുണ്ണുന്ന നയമാണ് ഇവിടെ നടക്കുന്നതെന്ന് കെ. സുരേന്ദ്രൻ കുറ്റപ്പെടുത്തി. രാജ്യത്ത് എൽ.പി.ജി സിലിണ്ടറുകളുടെ വില വർദ്ധിക്കുന്നതിന് കാരണം അന്താരാഷ്ട്ര വിപണിയിലെ പ്രതിസന്ധികളാണ്. മറിച്ചുള്ള ആരോപണങ്ങളെല്ലാം പ്രതിപക്ഷം ബോധപൂർവ്വം നടത്തുന്ന വ്യാജ പ്രചാരണങ്ങൾ മാത്രമാണ്. സംസ്ഥാനത്ത് വിലക്കയറ്റം രൂക്ഷമായിട്ടും അതിനെ നിയന്ത്രിക്കാൻ സർക്കാർ ഇടപെടുന്നില്ലെന്നും, നയപ്രസംഗത്തിൽ പോലും വിലക്കയറ്റം പിടിച്ചുനിർത്താനുള്ള യാതൊരു പ്രഖ്യാപനവും ഉണ്ടായിട്ടില്ലെന്നും അദ്ദേഹം വിമർശിച്ചു.
സി.എം.ആർ.എൽ മാസപ്പടി അഴിമതിയിൽ പ്രതിപക്ഷമായ യു.ഡി.എഫിന് മിണ്ടാൻ യോഗ്യതയില്ലെന്ന് കെ. സുരേന്ദ്രൻ പരിഹസിച്ചു. മുൻ യു.ഡി.എഫ് സർക്കാരിലെ പ്രമുഖ മന്ത്രിമാരെല്ലാം കരിമണൽ കമ്പനിയിൽ നിന്നും കൃത്യമായി വീതം പറ്റിയവരാണ്. മുൻ മുഖ്യമന്ത്രി പിണറായി വിജയനും മകൾ വീണ ടി.യും നടത്തിയത് കോടികളുടെ വലിയ അഴിമതിയാണ്. കേന്ദ്ര ഏജൻസികളുടെ അന്വേഷണത്തിലൂടെ എല്ലാ സത്യങ്ങളും പുറത്തുവരുമെന്നും സുരേന്ദ്രൻ പറഞ്ഞു. പിണറായി വിജയൻ അഴിമതിക്കേസിൽ അകത്താവണമെന്ന് ആത്മാർത്ഥമായി ആഗ്രഹിച്ച കോൺഗ്രസ് നേതാക്കളിൽ പലരുമാണ് തിരുവനന്തപുരത്ത് ഇ.ഡി റെയ്ഡ് നടന്നപ്പോൾ പോലീസിനെതിരെയും ഇ.ഡിക്ക് എതിരെയും തെരുവിൽ വന്ന് പ്രതിഷേധിച്ചതെന്നും ഇത് രാഷ്ട്രീയ നാടകമാണെന്നും അദ്ദേഹം കൂട്ടിച്ചേർത്തു.
തലസ്ഥാന നഗരിയിലെ വെള്ളക്കെട്ടുമായി ബന്ധപ്പെട്ട് കോൺഗ്രസും മറ്റ് സംഘടനകളും ഉന്നയിക്കുന്ന ആരോപണങ്ങൾ തികച്ചും രാഷ്ട്രീയപ്രേരിതമാണെന്ന് കെ. സുരേന്ദ്രൻ വ്യക്തമാക്കി. പുതിയ സർക്കാർ അധികാരമേറ്റ ശേഷം മഴക്കാലപൂർവ്വ ശുചീകരണ പ്രവർത്തനങ്ങൾ കൃത്യമായി നടത്തിയതിന്റെ ദൃശ്യങ്ങളും ചിത്രങ്ങളും താൻ നേരിട്ട് കണ്ടിട്ടുണ്ട്. കഴിഞ്ഞ സർക്കാരുകൾ ദശാബ്ദങ്ങളായി വരുത്തിവെച്ച വീഴ്ചകൾ വെറും ആറുമാസം കൊണ്ട് പരിഹരിച്ച് വെള്ളക്കെട്ടിന് പൂർണ്ണ ശമനമുണ്ടാക്കാൻ പുതിയ ഭരണസംവിധാനത്തിന് കഴിയില്ലെന്നും സുരേന്ദ്രൻ സർക്കാരിനെ പ്രതിരോധിച്ച് സംസാരിച്ചു.
