‘ഭരണത്തില് പാര്ട്ടിക്ക് നിയന്ത്രണം ഉണ്ടായില്ല….; പിണറായി വിജയനെ കേന്ദ്രീകരിച്ചുള്ള പ്രചരണം തിരിച്ചടിയായി’….
പിണറായി സര്ക്കാരില് പാര്ട്ടിക്ക് നിയന്ത്രണം ഉണ്ടായിരുന്നില്ലെന്ന കേന്ദ്രകമ്മിറ്റി റിപ്പോര്ട്ട് ഔദ്യോഗിക വെബ് സൈറ്റില് പ്രസിദ്ധീകരിച്ച് സിപിഐഎം. പിണറായി വിജയനെ മാത്രം ഉയര്ത്തിക്കാട്ടിയുള്ള പ്രചാരണം നിയമസഭാ തിരഞ്ഞെടുപ്പില് തിരിച്ചടിയായെന്നും റിവ്യൂ റിപ്പോര്ട്ടില് പറയുന്നു. ചില നേതാക്കളുടെ പരസ്യ പ്രതികരണങ്ങള് തിരിച്ചടി ആയെന്നും വിമര്ശനമുണ്ട്. സിപിഐഎം സംസ്ഥാന സെക്രട്ടറിയേറ്റ് ഇന്ന് ചേരും.
സിപിഐഎമ്മിലെ ഒരു പുതിയ കീഴ്വഴക്കമായി റിപ്പോര്ട്ട് പരസ്യപ്പെടുത്തുന്നത് മാറുകയാണ്. സാധാരണ കേന്ദ്ര കമ്മിറ്റി അംഗീകരിച്ച റിപ്പോര്ട്ട് പൂര്ണമായ വിശദാംശങ്ങളോടെ വെബ്സൈറ്റില് പ്രസിദ്ധീകരിക്കാറില്ല. എന്നാല് അഞ്ച് സംസ്ഥാനങ്ങളില് നടന്ന നിയമസഭാ തിരഞ്ഞെടുപ്പില് കനത്ത തോല്വി ഏറ്റുവാങ്ങിയ പശ്ചാത്തലത്തില് സിപിഐഎം നടത്തുന്ന തെറ്റുതിരുത്തല് നടപടിയുടെ ഭാഗമായിക്കൂടിയാണ് റിപ്പോര്ട്ട് പൂര്ണമായും പരസ്യപ്പെടുത്തുന്നത് എന്നാണ് വിവരം. കേരളത്തിലെ തോല്വിയുടെ കാരണങ്ങള് റിപ്പോര്ട്ടില് അക്കമിട്ട് നിരത്തുന്നുണ്ട്.
