മദ്യശാലയിൽ കയറിയ കുരങ്ങൻ കുപ്പി തുറന്ന് മദ്യപിച്ചു, ‘പൂസായി’ പിന്നാലെ..
റാഞ്ചിയിലെ ഒരു മദ്യവിൽപ്പനശാലയിൽ അപ്രതീക്ഷിത അതിഥിയായിയെത്തിയത് ഒരു കുരങ്ങൻ. പിന്നാലെ കുപ്പിയിൽ നിന്നും മദ്യം അകത്താക്കി, പൂസായി ഉറങ്ങിപ്പോയ കുരങ്ങൻറെ ദൃശ്യങ്ങൾ സമൂഹ മാധ്യമങ്ങളിൽ വൈറൽ. ജാർഖണ്ഡിലെ റാഞ്ചി ജില്ലയിലെ ഓർമാഞ്ചി ബ്ലോക്ക് ചൗക്കിലുള്ള മദ്യക്കടയിലാണ് സംഭവം നടന്നത്. പെൺകുരങ്ങാണ് കടയ്ക്കുള്ളിൽ കയറിയതെന്ന് റിപ്പോർട്ടുകൾ പറയുന്നു.
പകൽ ആളുകൾ കടയിൽ നിൽക്കുമ്പോഴാണ് കുരങ്ങൻ കടയ്ക്കുള്ളിലേക്ക് കയറിയത്. അവിടെമാകെ ചുറ്റിനടന്ന ശേഷം മദ്യക്കുപ്പികളിലൊന്ന് കുരങ്ങൻ കൈക്കലാക്കി. പിന്നാലെ കുപ്പി തുറന്ന് മദ്യം അകത്താക്കുകയായിരുന്നു. മദ്യം കഴിച്ചതോടെ പൂസായ കുരങ്ങൻ കടയ്ക്കുള്ളിൽ തന്നെ കിടന്ന് ഉറക്കവും തുടങ്ങി. അപ്രതീക്ഷിതമായ ഈ കാഴ്ച കണ്ട് കടയിലുണ്ടായിരുന്നവരും സമീപത്തുണ്ടായിരുന്നവരും അമ്പരന്നു. ചുറ്റും കൂടിയവർ സംഭവം തങ്ങളുടെ മൊബൈലുകളിൽ ചിത്രീകരിക്കുകയും പിന്നീട് സമൂഹ മാധ്യമങ്ങളിൽ പങ്കുവയ്ക്കുകയുമായിരുന്നു.
