പ്രിയദർശിനി പദ്ധതി; സ്വകാര്യ ബസ് മേഖലയിലെ നഷ്ടം പഠിച്ച സമിതി റിപ്പോർട്ട് സമർപ്പിച്ചു

തിരുവനന്തപുരം: കെഎസ്ആർടിസിയുടെ പ്രിയദർശിനി പദ്ധതി നടപ്പാക്കിയതിനെ തുടർന്ന് സ്വകാര്യ ബസ് മേഖലയ്ക്കുണ്ടായ നഷ്ടം പഠിക്കാൻ നിയോഗിച്ച വിദഗ്ധ സമിതി റിപ്പോർട്ട് സമർപ്പിച്ചു. സ്വകാര്യ ബസ് മേഖലയിലെ നഷ്ടം നികത്തുന്നതിനുള്ള വിവിധ ശുപാർശകളാണ് റിപ്പോർട്ടിലുള്ളത്. പ്രിയദർശിനി സർവീസിന്റെ ഷെഡ്യൂളിൽ മാറ്റം വരുത്തണമെന്നാണ് പ്രധാന ശുപാർശ. മുൻ ഡിജിപി കെ. പത്മകുമാർ അധ്യക്ഷനായ സമിതിയാണ് റിപ്പോർട്ട് തയ്യാറാക്കിയത്. റിപ്പോർട്ട് സമർപ്പിച്ചതിന് പിന്നാലെ മുഖ്യമന്ത്രി വി.ഡി. സതീശനും ഗതാഗത മന്ത്രിയും കൂടിക്കാഴ്ച നടത്തി.

ജൂൺ 15ന് പ്രിയദർശിനി പദ്ധതി നടപ്പാക്കിയതോടെ സ്വകാര്യ ബസ് മേഖലയിൽ വലിയ വരുമാന നഷ്ടമുണ്ടായെന്നാണ് ബസ് ഉടമകളുടെ പരാതി. പദ്ധതിയുടെ ഭാഗമായി 500 ബസുകൾ പൂർണമായി സർവീസ് നടത്തിയിരുന്നു. സംസ്ഥാനത്ത് നിലവിലുള്ള 11,000 ബസുകളിൽ പകുതിയോളം ഇപ്പോൾ പൂർണ സർവീസ് നടത്തുന്നില്ലെന്നും ബസ് ഉടമകൾ പറയുന്നു. കൊല്ലം, പത്തനംതിട്ട, വയനാട് ജില്ലകളിലാണ് പ്രതിസന്ധി രൂക്ഷം. സർക്കാരുമായി നടത്തിയ ചർച്ചയിൽ ആറ് ആഴ്ചയ്ക്കകം പ്രശ്നങ്ങൾ പഠിച്ച് റിപ്പോർട്ട് നൽകുമെന്ന് ബസ് ഉടമകൾക്ക് ഉറപ്പ് നൽകിയിരുന്നു. സ്വകാര്യ ബസ് മേഖലയിലെ നഷ്ടം നികത്താൻ റിപ്പോർട്ടിൽ ശുപാർശകളുണ്ടാകുമെന്ന പ്രതീക്ഷയിലാണ് ബസ് ഉടമകൾ. കെഎസ്ആർടിസിക്ക് നൽകുന്നതിന് സമാനമായി സ്വകാര്യ ബസ് മേഖലയ്ക്കും സാമ്പത്തിക സഹായം അനുവദിക്കണമെന്ന ആവശ്യവും ഉടമകൾ ഉന്നയിച്ചിരുന്നു. മൂന്ന് കേന്ദ്രങ്ങളിൽ സിറ്റിങ് നടത്തിയാണ് വിദഗ്ധ സമിതി ബസ് ഉടമകളിൽനിന്ന് പരാതികളും നിർദേശങ്ങളും ശേഖരിച്ചത്.