വഖഫ് ബോര്‍ഡ് പിരിച്ചുവിട്ടതിനെതിരെ പിണറായി വിജയന്‍….
തിരുവനന്തപുരം: വഖഫ് ബോര്‍ഡ് പിരിച്ചുവിട്ടതിനെതിരെ പ്രതിപക്ഷ നേതാവ് പിണറായി വിജയന്‍. വഖഫ് നിയമപ്രകാരം കാലാവധി തീരും മുന്‍പ് നിലവിലെ ഭരണസമിതിയെ പിരിച്ചുവിടാന്‍ സംസ്ഥാന സര്‍ക്കാരിന് നിയമപരമായി യാതൊരു അധികാരവുമില്ലെന്ന് അദ്ദേഹം ഫേസ്ബുക്കിലൂടെ വിമര്‍ശിച്ചു.
2016-ല്‍ എല്‍ഡിഎഫ് സര്‍ക്കാര്‍ വന്നപ്പോള്‍, ലീഗ് നേതാവ് റഷീദലി തങ്ങള്‍ ചെയര്‍മാനായ ബോര്‍ഡിനെ പിരിച്ചുവിടാതെ കാലാവധി പൂര്‍ത്തിയാക്കാന്‍ അനുവദിച്ച ജനാധിപത്യ മര്യാദ യുഡിഎഫ് കാട്ടിയില്ല. ഹൈക്കോടതി പരാമര്‍ശത്തെ തെറ്റായി വ്യാഖ്യാനിച്ച് ബോര്‍ഡ് പിരിച്ചുവിട്ട നടപടി ന്യൂനപക്ഷ അവകാശങ്ങളെ ഹനിക്കുകയും സംഘപരിവാര്‍ അജണ്ടകളെ സഹായിക്കുകയും ചെയ്യുന്നതാണ്. വഖഫ് ബോര്‍ഡ് പിരിച്ചുവിട്ട ഉത്തരവ് സര്‍ക്കാര്‍ അടിയന്തരമായി റദ്ദുചെയ്യണമെന്നും പിണറായി വിജയന്‍ ആവശ്യപ്പെട്ടു.
