ഫോണിൽ അശ്ലീല ദൃശ്യങ്ങളും സന്ദേശങ്ങളും… എസ്എഫ്ഐ കാസർകോട് ജില്ലാ സെക്രട്ടറിക്കെതിരെ പെൺകുട്ടിയുടെ പരാതി
കാസർകോട്: എസ്എഫ്ഐ കാസർകോട് ജില്ലാ സെക്രട്ടറിക്കെതിരെ സഹപ്രവർത്തകയായ പെൺകുട്ടിയുടെ ഗുരുതരമായ ലൈംഗികാരോപണ പരാതി. എസ്എഫ്ഐ ജില്ലാ സെക്രട്ടറി കെ അനുരാഗ് ഫോണിലൂടെ അശ്ലീല ദൃശ്യങ്ങളും സന്ദേശങ്ങളും അയച്ചെന്ന് കാണിച്ച് എസ്എഫ്ഐ ഏരിയാ കമ്മിറ്റി അംഗമായ പെൺകുട്ടിയാണ് സിപിഐഎം ജില്ലാ സെക്രട്ടറിക്ക് രേഖാമൂലം പരാതി നൽകിയിരിക്കുന്നത്. കുറ്റക്കാരനെതിരെ പാർട്ടി അടിയന്തര നടപടി സ്വീകരിച്ചില്ലെങ്കിൽ പൊലീസിനെ സമീപിക്കുമെന്നും പെൺകുട്ടി മുന്നറിയിപ്പ് നൽകിയിട്ടുണ്ട്.
രണ്ട് മാസം മുൻപാണ് ഈ സംഭവങ്ങളുടെ തുടക്കം. പരാതിക്കാരിയായ പെൺകുട്ടി ആദ്യം പാർട്ടി ഏരിയാ കമ്മിറ്റിക്കാണ് പരാതി നൽകിയിരുന്നത്. എന്നാൽ വിഷയം ഗൗരവമായി എടുക്കുന്നതിന് പകരം ഒത്തുതീർപ്പാക്കാനാണ് ഏരിയാ കമ്മിറ്റി നേതൃത്വം ശ്രമിച്ചത്. പലതവണ പരാതിപ്പെട്ടിട്ടും പാർട്ടി തലത്തിൽ യാതൊരുവിധ നടപടിയും ഉണ്ടാകാത്തതിനെ തുടർന്നാണ്, ഒടുവിൽ പെൺകുട്ടി എല്ലാ തെളിവുകളും സഹിതം സിപിഐഎം ജില്ലാ സെക്രട്ടറിക്ക് നേരിട്ട് രേഖാമൂലം പരാതി നൽകാൻ തീരുമാനിച്ചത്. പലതവണ ഇയാൾ അശ്ലീല സന്ദേശങ്ങൾ അയച്ച് ശല്യം ചെയ്തതായി പെൺകുട്ടി പരാതിയിൽ വ്യക്തമാക്കുന്നുണ്ട്. പെൺകുട്ടി നിലപാടിൽ ഉറച്ചുനിൽക്കുകയും പൊലീസിനെ സമീപിക്കുമെന്ന് വ്യക്തമാക്കുകയും ചെയ്തതോടെ പാർട്ടി നേതൃത്വം പ്രതിരോധത്തിലായിരിക്കുകയാണ്. ജില്ലാ സെക്രട്ടറിക്കെതിരെ പാർട്ടി തലത്തിൽ ഉടൻ തന്നെ ശക്തമായ അച്ചടക്ക നടപടിയുണ്ടാകുമെന്നാണ് നിലവിൽ പുറത്തുവരുന്ന സൂചനകൾ.
