ബജറ്റിൽ സിനിമയ്ക്കും പ്രാധാന്യം; ചലച്ചിത്ര സംഘടനകളുമായി ആദ്യ പ്രീ-ബജറ്റ് ചർച്ച നാളെ

സംസ്ഥാന ബജറ്റിൽ ചലച്ചിത്രമേഖലയുടെ ആവശ്യങ്ങളും നിർദേശങ്ങളും ഉൾപ്പെടുത്തുന്നതിനായി സിനിമാ സംഘടനകളുടെ അഭിപ്രായം തേടി സർക്കാർ. ഇതിന്റെ ഭാഗമായി ചൊവ്വാഴ്ച തിരുവനന്തപുരത്ത് ചലച്ചിത്ര മേഖലയിലെ വിവിധ സംഘടനാ പ്രതിനിധികളുമായി പ്രത്യേക യോഗം നടക്കും. സിനിമയുടെ ചുമതലയുള്ള സാംസ്കാരിക മന്ത്രി പി.സി. വിഷ്ണുനാഥിന്റെ നേതൃത്വത്തിലാണ് ചർച്ച സംഘടിപ്പിക്കുന്നത്.

സിനിമാ മേഖലയുമായി ബന്ധപ്പെട്ട വിഷയങ്ങൾ നയപരമായും സാമ്പത്തികമായും സർക്കാർ നേരിട്ട് കേൾക്കുന്ന നിർണായക വേദിയായാണ് യോഗത്തെ വിലയിരുത്തുന്നത്. നിർമാതാവ് എം. രഞ്ജിത്തിന്റെ അഭിപ്രായത്തിൽ, നയപ്രഖ്യാപനത്തിൽ സിനിമയെക്കുറിച്ച് പ്രത്യേക പരാമർശങ്ങൾ ഉൾപ്പെടുന്നതും സിനിമാ സംഘടനകളുമായി പ്രീ-ബജറ്റ് ചർച്ച നടത്തുന്നതും സംസ്ഥാന ചരിത്രത്തിൽ ആദ്യമായാണ്.

മുൻ സർക്കാർ സിനിമയെ വ്യവസായമായി പരിഗണിച്ച് രൂപീകരിച്ച സിനിമാനയം അംഗീകരിച്ചിരുന്നെങ്കിലും, അതിനെ നിലവിലെ സർക്കാർ എങ്ങനെ മുന്നോട്ടുകൊണ്ടുപോകുമെന്നതാണ് മേഖലയിലെ പ്രധാന പ്രതീക്ഷ. നിർമാണം, വിതരണരംഗം, തിയറ്റർ മേഖല, സാങ്കേതിക പ്രവർത്തകർ എന്നിവരുടെ ആവശ്യങ്ങൾ യോഗത്തിൽ ഉയർന്നുവരാനിടയുണ്ട്.

അതേസമയം, താരസംഘടനയായ ‘അമ്മ’യിൽ നിലനിൽക്കുന്ന ആഭ്യന്തര തർക്കങ്ങളിൽ സർക്കാർ ഇടപെടില്ലെന്ന നിലപാടും വ്യക്തമാണ്. സംഘടനാ വിഷയങ്ങളിൽ സ്വതന്ത്ര തീരുമാനങ്ങൾ സംഘടനകൾ തന്നെയാണ് കൈക്കൊള്ളേണ്ടതെന്ന സമീപനമാണ് സർക്കാരിനുള്ളത്.